திருவள்ளுவரின் ஞானவெட்டியான் பாடல் எண் 601- 700

பாடல் எண்:- 601

ஈராறுசுற்றமதில்- வன்னி- யெய்துஞ்சலநதிநான்கடந்து

நேராய்வாசிக்குதிரை- அது- நிர்ப்பந்தமாய்ப் பாய்ந்துஓடையிலே

ஆராய்ந்துமுப்பதுபேர்- கயிலை- அதிதசித்தவர்வந்தடக்கையில்தான்

மாராடியேமறித்தார்- வாசி- வல்லமையாலே விசுத்திவந்தேன்

அறுகோணஞ்சுற்றிமதில்- அது- ஆறுபத்துநெருப்பாறருகே

துருக்கல்மண்டபமும்- கனக- சொர்னத்தினால்ரத்தினச்சாவடியில்

திருமூர்த்திமூவருமே- தேவ- சித்தர்களும்வீற்றிருக்கையிலே

கருணைமலர்பொழிந்து- மூவர்- கண்டுமதிழ்ந்துகளிகூர்ந்தனர்- தன. 

பாடல் எண்:- 602

திருவள்ளுவனெனவே- ஞான- திருஷ்டியினாற்கண்டு தேவர்களும்

அருவுருவாய்மதுர- மலர்- வாசம்பொருந்திய ஆசிர்மத்தில்

இருமென்றவர்களுமே- கமல- இங்கிதஞான சுகாதிதத்தில்

உருவாய்ச்சொர்க்கப்பதமே- உப- தேசமுந்தந்து முத்தியளித்தார்

கருணாகடாட்சம்பெற்று- வா- சிக்காரிக்குதிரைமேல்சீனிவைத்து

ஏறிக்கனவேகமதாய்- அந்த- ஈரெட்டுமாமதில்தாண்டியபின்

குறிப்பாய் வருகையிலே- பின்- குவட்டுசித்தர்முப்பத்தாறுபேர்கள்

மறிப்பாய்மறித்திடவும்- வாய்வு- வாசியென்றபொடிதூவிவிட்டேன்- தன. 

பாடல் எண்:- 603

விசுத்தியறுகோணங்- காலி- வேகத்தினால்நடுமையத்திலே

உசத்தியதாயறிந்தேன்- வாசி- ஓகோகமலபீடமருகே

நிசுத்தம்வராமலுமே- கொண்டு- நேசமதாகமயேஸ்பரனார்

வசுத்தசித்தாதிகளும்- திரு- வள்ளுவனேஆசிர்மந்தனிலே

கனகரத்தினபீடங்- கருணை- கமலமலர்பொழிந்தேயருள

நினைவாய்மயேஸ்பரனும்- ஞான- நிஷ்டைதந்துயோக தீட்சைவைத்தார்

இன்பமாயுபதேச- முத்தி- யின்பத்துடன் தந்துஅன்பெனும்

மனதுகளிகூர்ந்து- சொன்- மாமதிமோட்சவரையளித்தார்- தன. 

பாடல் எண்:- 604

தத்துவந்தொன்னூற்றாறும்- அதில்- தசவாய்விலகப்பட்டபேர்களையான்

சுற்றத்தாரெண்ணாமல்- இவர்- தூரத்தாரென்றகற்றிவிட்டேன்

சத்தமதிலிருந்து- மூன்று- சாக்கிரவீடுமத்திபமதில்

கர்த்தரிருப்பிடங்காண்- தெய்வ- கமலமலராயிரத்தெட்டினில்

சித்திரச்சாவடியும்- ரத்தின- திவ்வியமாமணிக்கோபுரமும்

ரத்தினமதில்பதினாறு- ஜீவ- ரத்தினக்கோட்டைசுற்றமதிலும்

பக்தியுடன்வரவும்- வாசி- பதினாறுகலைசூழ்நதியருகே

தெத்துகாத்திடும்பேர்கள்- திரு- வள்ளுவனென்றறியாமலுமே- தன. 

பாடல் எண்:- 605

எழுபத்தீராயிரம்பே- ரெழுந்- தோடிவரும்போதினியாதுகாண்

வழுவாமலேயினிதான்- கவன- வாசிகொண்டுசீனிவைத்ததன்மேல்

இழுத்துஅங்குபடி- யானதி- லேறியேசவாரி தூறிடவும்

தொழுதேன்சத்தியனை- துதி- செய்துஆக்கினையிலேகினனே

அருள்பெற்றிலகுசுழி- சத்த- மாக்கினைவந்துஅடி பணிந்தேன்

இருள்போய்நிலவுபொழிந்- தினி- யேக்கமெல்லாம்விட்டுத் தூக்கமற்றுக்

கருவாய்விளங்குநாத- விந்து- கர்த்தவ்வியத்தைக் கண்டேமகிழ்ந்தேன்

பொருளாஞ்சதாசிவமும்- சத்தி- பொற்கமலநாடிப்போற்றி செய்தேன்- தன. 

பாடல் எண்:- 606

கதிர்மதிவான்புவியும்- நின்றுகாத்திருந்துபணியேவல்செய்யும்விதி

மதிநின்றிலகும்- விண்ணு- மண்ணுமுதல்வன்னிவாய்வதுவும்

நதிபதிகாரதுவும்- நவ- கோடிசித்தர்விந்துநாதமதும்

துதிநிதியுமெழுதோற்ற- மதுந்- தொழுதுதோத்திரஞ்செய்து பணிந்திடுங்காண்

முப்பத்துமுக்கோடி- முனி- தேவர்முதல்செந்துமிருகங்களும்

நாற்பத்தெண்ணாயிரம்- ரிஷி- நாரதர்கின்னரர்கிம்புருடர்

இப்படியாயிருக்கும்- இந்த- வேளைதனிற்கண்டுயான் பணிந்தேன்

ஒப்பனையாயெனக்கு- சொர்க்க- யோகதீட்சையுபதேசஞ்செய்தார்- தன. 

(கலித்துறை)

பாடல் எண்:- 607

யநமசிவ வென்று யான்வாசி யூதிநல் லாக்கினையில்

தினம்வைத் துகண்டத் தமர்வாசல் கீழ்வரை திசைபிசகா

மனம்வைத்துக் கும்பித்துச் சுழிமூல நாடி வாசிகொண்டு

தினந்துதித் தவரை யண்டத்தில் புக்குத் தெரிசித்தேனே. 

பாடல் எண்:- 608

வயநம சியென்று வாசிகொண் டாக்கினை மதிரவியாய்த்

தயிரிய மாய்க்கண்ட தாரையில் நேசத் தனித்துகந்து

மாய மாமூல வாசியி னாலந்த வட்டத்திலே

செகமாய் மேல்நோக்கி ஆக்கினை புக்குத் தெரிசித்தேனே. 

பாடல் எண்:- 609

சிவயநம வென்று வாசிகொண் டவரைச் சேவித்துமுன்

தவநெறியாய்க் கண்ட தாரை கீழ்நோக்கித் தவறுவரா

முவனச் சுழிமுனை திரிகோண வட்ட மூலத்திலே

தீவர மாயெழுந் தாக்கினை புக்குத் தெரிசித்தேனே. 

பாடல் எண்:- 610

மசிவயந வென்று மூலங் குடிகொண்டு வாசியினால்

வசிபொக்கி ஷங்கொண்டு வாவென்று வாசி மதிரவியில்

துஜராஜ யோகங் கும்பித்து வூதிச் சுழன்றெழுந்து

தெசவாய் வெழுப்பி ஆக்கினை புக்குந் தெரிசித்தேனே. 

பாடல் எண்:- 611

நமசிவ வென்று ஐவரை நாடி நலம்பெறவும்

தமதுலகா தீதம் பரப்பிர்ம மூலசந்நிதியில்

எமலபி காண மதிரவி கூடி யிசைவுபடத்

திமிர்தச் சுழியில்நின் றாக்கினை புக்குத் தெரிசித்தேனே. 

பாடல் எண்:- 612

ஐவர் தெரிசனஞ் சத்தி சதாசிவ மருசுருவும்

பைவினை நீக்கி மதிரவி கற்பம் பழுதுவரா

தைபிறை கொண்டு தசதீட்சை பத்துஞ்சார்ந்திடிலோர்

வையகம் வானம் புவிமுதற் கொண்டு வசியமதே. 

(கொச்சகம்)

பாடல் எண்:- 613

பராபரையொன் றாலெடுத்த பஞ்சகர்த்தா ளைவரையும்

தராதலமீரேழுமுயிர்ஜாதியொன்றாண்பெண்ணல்லவோ

நிராதரத்துள் ளேயிலகும் நீர்மேல்நெருப் பென்றறியார்

துராகதமாய் வெவ்வேறு சொன்னார்சு லோகமதே. 

பாடல் எண்:- 614

அல்லாகு தாவெனவு மைந்துகரம் வைத்துப்பணிந்

தில்லில்லா வெனத்துதித்து வினிமுடிசாய்ந் தேதொழுவார்

சொல்வா ருபதேசம் சூதர்களுஞ் சூலைவைத்து

வெல்வார்ஞா னப்பிரசங்கம் வெகுகிறிஸ் தவர்மனமே. 

பாடல் எண்:- 615

ஆத்துமம்பி ரிந்ததின்பின் னதிலிருப்ப தென்னவயம்

பூத்தான மாய்ப்புதைத்துப் போட்டுரவை சல்லாவே

சாற்றுமலர் பொழிந்து சாய்ந்துமுடி தானசையக்

காத்துசலாஞ் செய்தெங்கள் கர்த்தனே யெனத்துதிப்பார்

பாடல் எண்:- 616

உங்கள் தெய்வ மெங்கள்தெய்வ முண்டெனவும் வேறுசெய்து

அங்கங்கள் வேறுளதா யாகமங்க ளுற்பவித்தார்

பங்கமதாய் வேறுசெய்யும் பாதகரே யங்குமிங்கும்

எங்கெங்கு மாய்நிறைந்த ஈசனென் றறிகிலீரே. 

மதபேத கண்டனம்

(தரு)

உங்களுக்கும்எங்களுக்கும்பேதமாமோ- ஆண்டே

உள்ளுணர்ந்துபார்க்கவொருஎள்ளளவில்லை. 

பாடல் எண்:- 617

அங்கமந்தரங்கமனுபோகஞ்செயி- லாண்டே

அவரவர்க்குதிரம்கேளிவேறேயுண்டோ- விந்து

திங்களுஞ்செய்ர திகேளியுங்களுக்காண்டே- அது

செகப்பாமோஎங்கள்விந்துகறுப்பாமோ- பின்னு

மங்களஞ்சேரம்புவியிலமைத்தவிந்துபுவியில்- மாதர்

கருக்குழிதனிலமைத்தவிந்து- பிர்ம

இங்கிதமுளையெழும்அங்கமாச்சு- இரண்டும்

எந்தன்விந்துதந்தைவிந்துமொன்றாய்ப்போச்சே- உங்க. 

பாடல் எண்:- 618

ஊற்றுக்கால்மாறாதகங்கைஓடக்கரையில்- நல்ல

உன்னரியநாதவிந்துதங்குகையிலும்- மறு

வேற்றுமையாயுங்கள்விந்துபெருத்ததென்ன- பேதம்

விளங்கவுமெங்கள்விந்துசிறுத்ததென்ன- சொல்லும்

மாற்றதீதமுண்டோஇந்தஊத்தைக்குழியில்- வேறு

மனிதர்களோபிறப்பார்மாதர்குழியில்- உடல்

பார்த்துக்கரை யேறினவர்க்கொன்றேசாதி- ஜெகம்

படைத்தரக்ஷகன்சொன்னபாதையிதாண்டே- உங்க. 

பாடல் எண்:- 619

மூலக்கருக்குழியில்நாதமும்விந்தும்- நல்ல

முன்னும்பின்னுங்கூடியுருவாகிவெளியில்- விந்து

ஓலமுள்ளபாலரமைத்துத்தித்தபின்பு- ஆண்டே

உங்கள் ஜென்மம்எங்கள்ஜென்மம்வெவ்வேறாசொல்லும்- பேதம்

ஞாலமுள்ளதேகமெல்லாநாதவிந்தின்கூறு- பின்னும்

நம்முடையஉம்முடையதேகம்வேறோசொல்லும்- ருத்திரன்

ஆலவிடமுண்டசிவனாருமிந்தக்கூறு- அரு

ளாதியுமந்தமுமிந்தக்கூறதுவுமாண்டே- உங்க. 

பாடல் எண்:- 620

அச்சதுவுநின்றதெல்லாமாண்டையினி- கேளும்

அதிலெழுந்தபறவுயிருமெல்லாமொன்றும்- மேலும்

உச்சிதமுடனுனக்குச்சந்தத்தென்னவுண்மை- உறுதி

யெந்தனுடலதுதாழ்ந்ததென்ன- சொல்லும்

இச்சடலமச்செடலமிரண்டுமொன்று- ஆண்டே

இம்மயமுமம்மயமுமெல்லா- மொன்று

வச்சதென்னதச்சதென்னரூபமெல்லா- மொன்று

வளமானமயமதுவும்வஸ்துவெல்லாமொன்று- உங்க. 

பாடல் எண்:- 621

ஊணியனுபோகஞ்செய்யசுந்தரலிங்கம்- எண்சாண்

உந்தனுக்குமெந்தனுக்குஞ்சரிதான்காணும்- மாது

வாணிவிந்துஉந்தனுக்குவுசந்ததுண்டோ- நல்ல

வஸ்துவிந்துஎந்தனுக்குறைந்ததுண்டோ- மேலும்

நாணிதனுலிங்கமெல்லாமொன்றேலிங்கஞ்- ஜெக

நாதவிந்தினாலுதித்தலிங்கமது ஆண்டே- உயி

ராணியென்றதசைவெல்லாமசைவமொன்றே- ஆதி

யந்தமென்றுமுருவர்க்கியானவாறாண்டே- உங்க. 

பாடல் எண்:- 622

உருவென்னபுவிதனில்பிறந்தவர்க்கு- ஆண்டே

உற்றுணர்ந்துபார்க்கநாதவிந்துமொன்று- திரு

கருவென்ன இருவரும்வளர்ந்தவீடு- அதைக்

கண்டுகொள்ளும்ரெண்டுருவுமொன்றே- காணும்

அருளருவென்னஆணதுவும்- பெண்ணதுவும்

அமைத்ததென்னரெண்டுமொன்றுஆண்டையேகேளீர்- இது

கூறுமறிந்தோர்கள்கதிர்மதியுங்கண்டோர்- இனங்

கூறறிந்துவாசிகொண்டுஅமுதுண்டோராண்டே- உங்க

பாடல் எண்:- 623

அங்குலமுமங்குவரட்டிப் பிரமாணமாண்டே- இது

அங்குமுண்டுஇங்குமுண்டுஅறிந்துகொள்வீர்- மதி

சங்கவெளிகண்டலிங்கமங்குலங்காணுஞ்- செயல்

தனக்கொன்றுஎனக்காறுகணக்காரோசொல்லும்- உங்கள்

மங்கையும்வந்தநாவினால்மைந்தரும்வந்த- இந்த

வழியறிந்துஒன்றமைத்தபிறப்பிரண்டோ- முன்பு

இங்குமங்குமெங்குந்தானாயிந்திரியங்காண்- வந்த

எறும்புகடையெண்பத்துநான்குயிருமொன்றே- உங்க

பாடல் எண்:- 624

இக்குலந்தனிலேஜீவராசி- இந்த

இகந்தனிலும்விளைந்தஇந்திரியங்காண்- ஜெக

மக்குலங்களாவதுமனேகமுயிர்காண்- ஆதி

அந்தமிதுரெண்டுகூடிசாந்தமிதுகாண்- கண்ட

துக்கமேஜெகமனைத்துந்தன்பமிதுவாம்- அருள்

துரியாதீதங்கடந்தோர்சூக்ஷதேகங்காணும்- அன்னை

மக்கள்மாதருமீன்றவாலாம்பிகைதான்- வகை

வையமும்வானமிருமா தளவாலாண்டே- உங்க. 

பாடல் எண்:- 625

பள்ளையாடுசெம்மறியின்குட்டியாமோ- நல்ல

பசுவைக்கிடாமருவக்கிடாரியாமோ- பின்னு

முள்ளமதிலென்குலத்திலுன்குலஞ்சேர்ந்தால்- புத்திரன்

உன்னுதொன்றோஎன்னுதொன்றோஉணர்வீர்காணும்இனி

துள்ளுஞ்சேவல்கொக்கைச்சேர அண்டாமாமோ- செழும்

நாரைகோழியைச்சேரக்குஞ்சதாமோ- நல்ல

பள்ளப்பாகல்வித்ததுவுஞ்சுரையாமோ- இந்தப்

பட்சியிலும்பேதாபேதந்தோன்றுமாண்டே- உங்க. 

பாடல் எண்:- 626

எள்ளளவும்பிழையில்லையென்நூல்காணும்- எந்தன்

குருவான அகத்தீசரருள்தான்காணும்- வேறு

கள்ளர்கள் வெவ்வேறுபிரித்துக்கருத்திலெண்ணி- ஞானங்

கண்டகண்டவிதம்சொல்லிக்கலங்கினார்காண்- பின்னுந்

துள்ளித்துள்ளிவாய்ப்பினத்திதுக்கிப்பார்க்கிலேசஞ்- செய்தி

சொன்னாலுஞ்செவிகேளாதுதுன்மார்க்கர்காணும்- மாது 

வள்ளலெனுமம்பிகைப்பெண்வரத்தால்வந்த- திரு

வள்ளுவசாம்புவமூர்த்திவம்மிசமாண்டே- உங்க. 

(விருத்தம்)

பாடல் எண்:- 627

கமலமல ராயிரத்தெட் டிதழில்வளர்ந்

திலகுமதி கருவூர் நாட்டில்

குமிழியொரு துளியில்பதி னாயிரத்தி

னொருதுளிதோய்ந் தெருதிக் கூர்ந்து

அமிர்தமதி யின்பசுக மதுரசர்

வாணியில மைத்த விந்தால்

திமிர்தமாய் ஜெகநாத ரருளஇந்த

வகையெல்லாந் தெளிவிப் போமே. 

பாடல் எண்:- 628

அண்டர்களு முனிவர்களு மறியாத

வெகுசூக்ஷ மறிய லானேன்

துண்டர்கள் தான் கூடிவெகு மதபேத 

முணர்ந்துமொழி தொகுப்புண் டாக்கிக்

கண்ட கண்ட படியெல்லாம் நூல்வசன

மாய்க்குறித்துக் கவிகள் பாடி

எண்டிசைமா ணாக்கரிவை உண்மையென்று

மயங்கவைத்து இறந்திட் டாரே. 

(கொச்சகம்)

பாடல் எண்:- 629

கொத்திப் பிறப்பிலது கொம்பிலிளம் பாவைவிட்டுப்

பத்திமுளைத் ததுவுமிதி பாவலகு வாகுமோதான்

சுத்தியுடன் பூசைசெய்யுஞ் சுந்தரரே யென்மனையில்

சத்தியைநீ சேர்ந்ததனால் தரியாதோ கெர்ப்பமதே. 

பாடல் எண்:- 630

இஞ்சியிட மஞ்சளுண்டோ ஏலமிடச் சுக்காமோ

நஞ்சுகந்த எட்டியிலும் நல்லஎலு மிச்சையுண்டோ

துஞ்சுபுகழ் பூசைசெய்யுஞ் சுந்தரரே யென்குலத்தில்

வஞ்சியைநீ சேர்ந்ததனால் மைந்தன் தரியாதோ. 

பாடல் எண்:- 631

அம்புவியின் மானதனை யறியவரா கம்புணரக்

கும்பிலிரு வாகியதுங் குட்டி யளிக்குமோதான்

நம்பிறவி யந்தணரே ஞாயமுள்ள சூத்திரரே

வம்புரைத்தி ரென்குலத்தை மருவவுரு வாகாதோ. 

(கலித்துறை)

பாடல் எண்:- 632

குட்டிக் கிடாவும் பசுமேல் மருவக் குறியென்னகாண்

முட்டி யெருது முதிப்பதுண் டோஜெக மூடர்களே

மட்டிக் கிடாவுக்கு மாவின் பிறவிக்கும் வாறறிந்தால்

எட்டிக் கனிவந் தெலுமிச்சை யாகுமோ ஈனர்களே. 

(வெண்பா)

பாடல் எண்:- 633

மச்சமதைக் கூர்மம் மருவிக் கலவி செய்தால்

உச்சிதமாய்த் தாதுவிந்து வுருவாமோ- நிச்சயமாய்

எந்தன் குலத்தி லியல்வான வேதியரே

வந்தணை ந்தால் விந்துவுரு வாறு. 

பாடல் எண்:- 634

முல்லைமலர் கம்பநட்டு முக்காலும் நீர்தெளித்தால்

மல்லிகைப்பூ வாசம் வருமோ தான்- தொல்லுலகில்

சோதிவிந்து நாதந் துளியிலுயி ராமவர்க்கு

ஜாதிகுல பேதமில்லை தான். 

(கலித்துறை)

பாடல் எண்:- 635

ஈரேழு லோகம் பதினாலு யர்ந்திரு காலுயர்ந்த

நேரான ஜாதி ஆண்பெண் ணிரண்டும் நிரந்தரமாய்ப்

பேரான செங்கதிர் சந்திர னுண்டண்ட பிண்டமுண்டு

சீரான அன்னமுந் தண்ணீரு முண்டு தெய்வமின்றே. 

பாடல் எண்:- 636

புத்திமதி யில்லாமல் வெடிகோடி மந்திரம் புலம்பியுமே

சத்தியில் வாழ்ந்து தியங்குவர்காண் சர்வ லோகமெல்லாஞ்

சுத்தி தசாதியின் பேதகந் தன்னைச் சொல்லுமவர்

எத்திப் பணத்தைப் பறிக்குந் திருட ரியம்புவனே. 

(விருத்தம்)

பாடல் எண்:- 637

மண்டலத்தில் குருக்களென்று பேறும் பெற்று

மகத்தான தூளிதம ணிந்து கொண்டு

குண்டலங்கள் செவியிலிட்டுக் குல்லா சாத்திக்

கோகரணங் கெசகரண மிரண்டுங் கற்றுத்

தெண்டிரையிற் பலவிதமாய்ப் பொய்கள் சொல்லிச்

சீஷருக்கு முபதேசந் தெளியச் சொல்வார்

ஒன்றுமில்லை யவர்கள் கையில் வித்தை யாச்சு

உள்ளவர்த்த மானமிதை யுரைசெய் வேனே. 

பாடல் எண்:- 638

நேத்திரத்தில் துகில்வாங்கி யுடுத்திக் கொள்வார் 

நின்றவரை வல்லியென்றுந் துரத்திக் கொள்வார்

கோத்திரங்கள் விளங்கமுத்தி தருவோ மென்று

கூறுசொல்லி நீறதனைக் குழைத்துச் சாத்தி

சாஸ்திரத்தைச் செவிதனிலு மாண்டே கேளீர்

தவமாகு மஞ்செழுத்தைச் சாற்று வார்கள்

சூத்திரத்தை யின்னதென் றறிந்து பார்க்கச்

சொல்லரிய வைம்பூத மாச்சு தாண்டே. 

பாடல் எண்:- 639

உற்றுநின்ற சாஸ்திரத்தைப் பார்த்துப் பார்த்து

ஊணுகிடை யாமலுந்தான் பிரட்டிப் பேசி

பத்தரென்றுங் குருக்களென்றும் வகுத்துச் சொல்வார்

பரகதியுந் தருவமென்று பணம்ப றிப்பார்

வித்துநின்ற விடங்காணார் வேருங் காணார்

விளங்குபரந் துலங்குகின்ற வீடுங் காணார்

எத்தவமுந் தருளமென் றுலகஞ் சுற்றி

யெளியோர்கள் பாவமெல்லா மினிக்கொள் வாரே. 

பாடல் எண்:- 640

உடலெடுத்த நேர்மைகண்டால் குருக்க ளாகும்

உள்ளுணர்ந்து பாராதார் மருக்க ளாகும் 

செடமெடுத்த வுயிர்கள் கண்டால் தீட்சை யாகுஞ் 

செயலறியார் குருபூசை தெளிந்து கூடார்

குடலெடுத்த பசியறியறிந்தா லாசா னாகுங்

குறிப்பறிந்து கொள்ளாதார் போசா னாகும்

சுடலடுக்குங் கணக்கதுவு மான தாலுஞ்

சொல்லுகிறேன் மந்திரமும் நில்லா தாண்டே. 

பாடல் எண்:- 641

அடியான பாதமதும் வளர்ந்த தெங்கே

ஆதிநட னம்புரிந்த தந்தை யெங்கே

வடிவான மூங்கிலெங்கே வட்ட மெங்கே

வளர்ந்ததெழுந்த ஆயிரத்தெட் டிதழு மெங்கே

கொடியான மகமேரு வளர்ந்த தெங்கே

குருவென்றுஞ் சீஷனென்றும் பிறந்த தெங்கே

முடிவான சிரமெங்கே சடல மெங்கே

முதலிருந்த குருவெங்கே அழைத்த தேதோ. 

பாடல் எண்:- 642

ஓதுகின்ற வேதமது பிறந்த தெங்கே

உன்னியநீ ரிறைக்குமிட முயிரு மெங்கே

வாதுகள்செய் மந்திரமும் பிறந்த தெங்கே

மறைவேத சைவர்களும் பிறந்த தெங்கே

சூதுகள்கண் டிவையறிந்தால் குருக்க ளாகுந்

தொல்லுலகி லறியாதார் நம்மி லொன்று

ஏதுமில்லாப் பொய்களவு சொல்வார் காணும்

இவைராஜ யோகியென்று மியம்ப லாமே. 

பாடல் எண்:- 643

விட்டகுறை வருமளவு முபதே சங்காண்

மெய்யுடலுந் தளர்ந்துபுவி மேலு நோக்கித்

தட்டழிந்து விழும்போது ஓதி வைத்த

சாஸ்திரத்தில் க்ஷணப்போது மறிக்கப் போமோ

எட்டுரெண்டு மறியாதார் குருக்க ளாமோ

என்னையினிப் பறையனென்றுந் தள்ள லாமோ

மட்டமரும் பூங்குழல்வா லாம்பி கைப்பெண்

வங்கிசத்தி லுதித்தசாம் புவனு நானே. 

பாடல் எண்:- 644

நரகமதைத் தவிர்த்து சொர்க்கந் தருவோ மென்பர்

நாட்டிலுள்ள காரியமாங் குருக்கள் வந்து

நரகமது நின்றதற்கு நிறந்தா னென்ன

நமனான எமனைவெல்ல நானே யென்பார்

இறப்பிறப்பு மறிந்துணர்ந்து உரைத்தா னாகில்

எம்பிரா னென்றவரைப் பணிவேன் காணும்

மறுபிறவி யுண்டென்பா ருலகத் தாசான்

மதியெனது கருத்தினிலுங் காணே னாண்டே. 

பாடல் எண்:- 645

இருவினையுந் தனையுரைத்து வுலகத் தாசான்

இறந்தவுடல் விழுந்தாவி பிரிந்த பின்பு

மறுசெனன மாகிவந் துடலெ டுத்து

வாழ்புவியில் வருவமென்று வகுத்துச் சொல்வார்

குருவறிந்து புவியில்வந்து வயது நூறு

குறிப்பாகப் பிறந்திருந்தால் குழந்தை யாமோ

அறிவதிக நற்பிறவி பிறப்பா ரென்று

மதிதவெகு பொருள்களெலாம் பறிப்பா ராண்டே. 

பாடல் எண்:- 643

விட்டகுறை வருமளவு முபதே சங்காண்

மெய்யுடலுந் தளர்ந்துபுவி மேலு நோக்கித்

தட்டழிந்து விழும்போது ஓதி வைத்த

சாஸ்திரத்தில் க்ஷணப்போது மறிக்கப் போமோ

எட்டுரெண்டு மறியாதார் குருக்க ளாமோ

என்னையினிப் பறையனென்றுந் தள்ள லாமோ

மட்டமரும் பூங்குழல்வா லாம்பி கைப்பெண்

வங்கிசத்தி லுதித்தசாம் புவனு நானே. 

பாடல் எண்:- 644

நரகமதைத் தவிர்த்து சொர்க்கந் தருவோ மென்பர்

நாட்டிலுள்ள காரியமாங் குருக்கள் வந்து

நரகமது நின்றதற்கு நிறந்தா னென்ன

நமனான எமனைவெல்ல நானே யென்பார்

இறப்பிறப்பு மறிந்துணர்ந்து உரைத்தா னாகில்

எம்பிரா னென்றவரைப் பணிவேன் காணும்

மறுபிறவி யுண்டென்பா ருலகத் தாசான்

மதியெனது கருத்தினிலுங் காணே னாண்டே. 

பாடல் எண்:- 645

இருவினையுந் தனையுரைத்து வுலகத் தாசான்

இறந்தவுடல் விழுந்தாவி பிரிந்த பின்பு

மறுசெனன மாகிவந் துடலெ டுத்து

வாழ்புவியில் வருவமென்று வகுத்துச் சொல்வார்

குருவறிந்து புவியில்வந்து வயது நூறு

குறிப்பாகப் பிறந்திருந்தால் குழந்தை யாமோ

அறிவதிக நற்பிறவி பிறப்பா ரென்று

மதிதவெகு பொருள்களெலாம் பறிப்பா ராண்டே. 

பாடல் எண்:- 646

வித்திருந்தால் விளைவுமுண்டு மரந்தா னுண்டு 

வேரற்றால் மரமதுவுந் தளிர்க்கு மோசொல் 

சத்தியமா மொழியவுங்கா ணாண்டே கேளீர் 

சாஸ்திரத்தை மெய்யெனவு நம்பொண் ணாது

செத்தசவ முயிரொடுங்கி நின்ற போது

சிறுமதலை யாய்ப்புவியிற்  பிறந்த தேது

இத்தையினி யறியாத உலகத் தாசான் 

இறந்தவுடல் பிறக்குமென் றியம்பு வாரே. 

பாடல் எண்:- 647

பாதமது மாயிரந்தா னுள்ள அட்டை

பதறியது காதவழி நடக்கு மோசொல் 

பேதமில்லா சாஸ்திரங்கள் நமக்குச் சொல்லும்

பிரபலம்போல் தூக்கம்வரு மறிந்தி டாது

வேதமதை நமக்குரைப்பா ரவர்கள் தங்கள்

விதிப்பயனை யின்னதென்று விளங்க மாட்டார் 

நாதவிந்து வுற்பவமே யெவருங் காணார்

நாட்டிலுள்ள குருக்களறி யார்கள் தானே. 

பாடல் எண்:- 648

பாரான வுலகத்து மாண்பர்க் காகப்

பகிர்ந்துரைத்தே னறிவுள்ளோ ரறிந்து கொள்வீர்

கூரான கோழியுடன் போத்து மாகில்

கொடிதான வலியனுடன் காடை கேளீர்

பேரான கடுநாரை கோட்டான் கிள்ளை

பெரிதான கெருடனுடன் குட்டி நாரை

சீரான சகுனமது நமக்குக் காட்டுந்

தீங்கதுக்கு வருவதுதான் தெரியா தாண்டே. 

பாடல் எண்:- 649

இலக்கணநூ லறிந்துகவி யினமாய்ப் பாடும்

இவர்களுரைப் பதுவாஞ்சை யிகத்துக் கொக்குஞ்

சிலைகள்கல்லு மனிதர்கள்மேல் சீர்தான் கோணா

செம்பொன்பொருள் பறித்துமிகச் செகத்தில் வாழ்வார்

துலக்கமில்லாக் கவிமிகவுந் தொடுப்பார் புஷ்பந்

தொடுப்பதுபோல் வயிறுவளர்த் திடுஞ்சூ தாகும்

கலக்கம்வரு மவரவர்க்கே யெழுத்தெல் லாம்போய்க்

கர்மவினை யாலொழிய வருந்து வாரே. 

பாடல் எண்:- 650

ராசிலக் கினமிருபத் தேழுங் காற்று

நாடதிலு மிரந்தைய முண்டே செல்தார்

வாசியிருந் துலவும்மா வாசி காணார்

வயதுகுறைந் திடுநூறில் சுவாசங் காணார்

கோசபீ சத்தொழிலுங் குறியுங் காணார்

குறிப்பறிந்து மூலத்தின் குறியுங் காணார்

ஆசுமது ரக்கவிதை பாடும் பேர்க்கு

அவரவர்க்கி ரட்டியிவர்க ளனுபோகந் தானே. 

பாடல் எண்:- 651

தனக்குவரும் வழியறிந்து விதிக்க மாட்டார்

தரணிதனி லெவருக்குஞ் சாஸ்திரஞ் சொல்வார்

செனிக்கும்வினை நல்வினை தீ வினையுங் காணார்

தேய்பிறையும் வளர்பிறையுஞ் செப்பார் காணும் 

சுணங்கனது போல்திரிந்து ஜோஸியஞ் சொல்வார்

சூதர்களைப் போலொருபொய் சொல்வா ரில்லை

எனக்குமுனக் காதியிலும் விதித்த தந்தை

இந்திரியக் கூறறிந்து இயம்பா ராண்டே. 

பாடல் எண்:- 652

அந்தணரும் வேதியருஞ் சாஸ்திரி மாரு

மகிலமெல்லா மிரட்டுகின்ற ஆசான் மாரும்

சந்தமதாய்ச் சொல்லியென்கைப் பொருளும் வாங்கி

சாஸ்திரத்தால் முகூர்த்தமெனுஞ் சாந்தி செய்வார்

எந்தன்விதி வந்ததென்றால் நானும் போறேன்

எனக்குசற்றுங் குறைந்ததென்றா லினியங் கேது

சொந்தமுட னுங்கள்மனை வேத மோதுந்

தொல்லுலகி லுள்ளமட்டும் வாழொண் ணாதே. 

பாடல் எண்:- 653

தனக்கவஸ்தை வருகிறதை யறியா மற்றான்

சாஸ்திரங்கள் சொல்லிவயிறு தனைவ ளர்ப்பார்

கணக்காக வகுத்துமிவை பார்க்கும் போது

கருத்திலுந்தான் மறுபிறவி கனவிற் காணேன்

எனக்குமுத்தி தருவமென்றா ரவரு மாண்டார்

எளிதான தீட்சைபெற்று மிவரு மாண்டார் 

உனக்கெனக்கென் றறிந்துவுரை யுணர்ந்து கொள்வார்

உகமையறிந் தசருரைத்துப் பறையென் றாரே. 

பாடல் எண்:- 654

உகமையறி யாமனிதர் கோடா கோடி

உரையறியா மாந்தரொரு கோடா கோடி

வகையறியா சாஸ்திரிமார் கோடா கோடி

வண்மையில்லாத் தெளிவுடையோர் கோடாகோடி

திகையாம லெனைப்பறைய னென்று சொல்லுந்

தீங்காண மாந்தரெனைத் தள்ளினார்கள்

நகைபுரிந்து புரமெரித்த சோதி நாதன்

நளினபுவி படைத்தவகை நாம்சொல் வோமே. 

ஈஸ்வர சிருஷ்டி

(தரு)

ஆதியானசோதியிந்தப்புவிபடைத்த-முன்னோர்

அருமையச்சொல்லுகிறேனாண்டையேகேளீர். 

பாடல் எண்:- 655

ஆதியில்லைஅந்தமில்லைரூபமில்லை- காலம்

அண்டரண்டபேரண்டமும்பிண்டமில்லை

ஜாதியில்லைநா தியில்லைஆண்பெண்ணில்லாக்- காலந்

தாணுவாய்நாதவிந்துவூணுதலாக

ஓதியதோர்வேதமில்லைமறையோரில்லை- சாஸ்திரம் 

ஒன்றுமில்லையன்றுமின்றுமொன்றதாச்சு- இந்த

சேதிவரலாறறியநாள்செல்லுஞ்- ஜெகம்

ஜெனனமெடுத்தாலிந்ததேகங்காணாண்டே- ஆதி. 

பாடல் எண்:- 656

மின்னலிடிகாற்றுமழைக்கொண்டலுமில்லை- நல்ல

விண்ணுமில்லைமண்ணுமில்லைவேதமுமில்லை- மேலுஞ்

சொன்னமில்லைஅன்னமில்லைதண்ணீருமில்லை- இந்த

ஜெகதலம்படைத்தவகைசெப்புவேன்காணும்- ஆதி

பின்னுமில்லைமுன்னுமில்லைபேருலகிலில்லை- வளம்

பெருமையைச்சொல்லவும்யானும்பேர்தானில்லை- முன்பு

தன்னையறிந்தென்னைவளர்த்தன்னையினாலும்- இந்த

சர்வலோகமானவகைசாற்றுவேனாண்டே- ஆதி

பாடல் எண்:- 657

ஈரேழுபதினாலுலகுமெங்கெங்குமில்லை- நல்ல

இமையோர்களிந்திராதியில்லாதநாளில்- ஆதி

பேரிருபத்தேழுநக்ஷத்திரங்களில்லாக்காலம்

பேருலகும்வந்தவகைபேசுவேன் காணும்- அந்தம்

வேரேழுவாரிதிவானம்வந்தவகைகாண்- இந்த

மண்ணும்விண்ணுமுற்பவித்தமார்க்கமிதாகும்- புவி

காருலகுமேபடைத்தகர்த்தனருளால்- இந்தக்

கருத்தையுநூல்விதியாய்க்கண்டேன்காணாண்டே- ஆதி. 

பாடல் எண்:- 658

தாபரசங்கமுமில்லைசெந்துகளில்லை- நல்ல

தாணுவாய்விளங்குங்கதிர் தண்மதியில்லை

பாரதனிலாதித்தன் நக்ஷத்திரமில்லாக்- காலம்

பார்படைத்தஓர்முதலைப்பாடுவேன்காணும்- ஆதி

ஆரபாரமாயுலகிலிருதான்மூடி- மேலும்

ஆதியென்றஜெகத்திருள்முனைதானாடி- விந்து

வாரதெழுபாருக்குள் ளேவிளங்கியிருந்த- நன்றாய்

வழுவாமலுமெழுந்தவாறுசொல்லுவேனாண்டே- ஆதி. 

பாடல் எண்:- 659

பாரானவட்டம்பத்தனந்தங்கோடி- நல்ல

பரிவாசலதுரெட்டிபகருவேன்காணும்- கனல்

நேரானவன்னியதுமிரட்டியதாகும்- நிலை

நெறியானவாசிவெளிரெட்டியதாகும்- பின்பு

வாறதொருநாதத்திலும்விந்துதோன்றி- மதி

வலுவானவிந்தில்சதாசிவனுந்தோன்றி- செயல்

சீரானசதாசிவத்தில்மயேஸ்பரன்தோன்றி- பின்பு

சிறந்தமயேஸ்பரத்தில்ருத்திரன்தோன்றி- ஆதி. 

பாடல் எண்:- 660

உதித்ததொருருத்திரனில்விஷ்ணுவுந்தோன்றி- மேலும்

ஊன்றியும்விஷ்ணுவுக்குள்பிர்மாவுந்தோன்றி- யுடல்

கதித்ததொருபிரமாவிலாத்துமந்தோன்றி- கரு

கனமான ஆத்துமாவிலாகாசந்தோன்றி- ஆண்டே

சேதித்தஆகாசந்தனில்வாயுவந்தோன்றி- சித்தி

சிறந்தருளும்வாய்வதுக்குள் தேயுவந்தோன்றி- மூலந்

ததித்ததேய்வுதனிலுமப்புவந்தோன்றி- மிகவுஞ்

சதிரான அப்பதுக்குள் பிருதிவியாண்டே- ஆதி. 

விருத்தம்

பாடல் எண்:- 661

வளர்ந்தருளும் புவிதனிலு மாண்டே கேளீர் 

வளமாகும் வித்தில்லா விளைவுண் டாகித்

தளர்ந்ததிக அஞ்சுருவா யாணி யாகி

சர்வலோ கங்களுக்குத் தாணு வாகித்

தெளிந்தெழுந்த அண்டபிண்டம் கண்ட மாகி

ஜெகத்திலுள்ள ஜீவஜெந்து செழிக்கத் தானுங்

குளிந்தரு ளாறாதாரக் கமல மாகிக்

கொண்டுநின்ற சுழிமுனையா மகமே ராண்டே. 

பாடல் எண்:- 662

ஓங்கார மாவதுவு மகமே ராகும்

உதித்துநின்ற பர்வதத்தைச் சுற்றி மேவும்

நீங்கரிது அசையாத கிரிதா னுண்டு

நினைவரனு மேதெனவே யாண்டே கேளீர் 

வாங்கார அகரமுடன் உகரம் ரெண்டு

மருவிநின்ற நகரமுடன் மகரத் தோடு

பாங்கான சிகரமுடன் வகரம் ரெண்டு

பரிவான யகரமாதா லக்ஷரமுண் டாச்சே. 

பாடல் எண்:- 663

கூறுகின்ற அக்ஷரமு மஷ்ட வெற்பாய்க்

கொள் கிறதோர் சுழிமுனைதான் மகமே யாகும்

மேருவெனு மெழுந்தநுனி முனையி லேதான்

விரிவதிலுன் சிவசிங்கா தனத்தின் மீதில்

சீர்கொண்ட பார்வதியுஞ் சிவனு மங்கே

ஜெகந்தழைக்க எழுந்தருளி யிருப்பா ரொக்க

பேர்கொண்ட விருவருந்தா னிருந்த வீட்டில்

பேசுகிறே னெனமூன்று மொன்றாச் சாண்டே. 

பாடல் எண்:- 664

மூன்றுபதி யேதென்றா லுணரக் கேளீர் 

முதல்மேலு மடியினிலும் நடுவில் தானும்

வேன்றுமகா மேருவுந்தான் முடியி லாதல்

விதமாக எழுந்துநிற்கு மென்மே லாகத்

தோன்றிநிற்குங் கயிலாச மிதுகா னென்று

துடர்ந்துநிற்பா ரீஸ்பரனீஸ் பரியுந் தானாய்த்

தூண்டிமுடி யாதவொளி பிரகாசத்தைச்

சொல்லுகிறே னுலகெங்குஞ் சுபஸ்த மாண்டே. 

பாடல் எண்:- 665

அக்கினியு மேருவுக் கடிதா னாகும்

ஆதித்த னதினடுவில் பிரகாசிக்கும்

திக்கினிய சந்திரனு முடிய தாகுஞ்

செப்புகிறே னதற்கப்பா லளவற் றேபாழ்

தக்கினிமுப் பாழதுக்கு மூன்று பேருஞ்

சாற்றுகிறேன் சிவம்பாழாஞ் சத்தி பாழாம்

கைக்கினிபோல் பரமதுக்குப் பரையி னாட்டங்

கருத்துபோ லளவற்ற பெரும்பா ழாண்டே. 

பாடல் எண்:- 666

அளவற்ற பெரும்பாழின் வெளியி லேதான்

ஆதியும னாதியுமாய் ரூப மாகி

அளவற்ற பேரொளியா யானேகங் கோடி

ஆணுமல்ல பெண்ணுமல்ல அலியு மல்ல

விளைவற்று நின்றதல்ல விளையா தல்ல

வித்தாகி நாதாந்த ஞான ரூபக்

களைபெற்று இலங்கும்பிர காச மான

கதிர்மதியி லொருபுறமாய் மலராப் பூத்தே. 

பாடல் எண்:- 667

கண்ணுருவாய்க் கண்டதல்ல காணா தல்ல

கருத்தாலு மதித்ததல்ல கருதா தல்ல

எண்ணுருவாய் நின்றதல்ல இல்லா தல்ல

எழுதிமுடிந் தறிந்ததல்ல அறியா தல்ல

விண்ணுருவு மானதல்ல ஆகா தல்ல

வேதமறை யொழிவதல்ல ஒழியா தல்ல

நண்ணுதலின் நின்றதல்ல நில்லா தல்ல

நயம்பெறவஞ் சுயம்பெனும்பிர காச மாண்டே. 

பாடல் எண்:- 668

மந்திரத்தால் கற்பத்தால் கற்கா தல்ல

வாசித்து அறிந்ததல்ல அறியா தல்ல

தந்திரத்தா லெடுத்ததல்ல ஏடுக்கா தல்ல

க்ஷணத்துக்கு ளிருப்பதல்ல தனதே யல்ல

சுந்தரமாம் ரூபமல்ல அரூப மல்ல

சொல்லாத வடிவல்ல சோதி ரூபம்

அந்தரமாய் நிராதார வெளியி லேதான்

அடியிலொரு கொடிமுடியாய்த் தழைத்ததாண்டே. 

பாடல் எண்:- 669

தழைத்தெழுந்த கயிலாசந் தள்ளி டாமல்

தாங்கினது மேதென்றால் நிராதார ரந்தான்

வழைத்தநிரா தாரத்தை ஆதாரந் தாங்கும்

வளமான ஆதாரந் தன்னைத் தானும்

முளைத்தெழுந்த மூலாதி பாதந் தாங்கும் 

முதல்மூல மக்கினிதான் சூக்ஷ மாகிச்

செருத்தெழுந்த மூலாதி பாத மாண்டே

செப்புகிறேன் கீழ்மேலாய்ச் சிறந்து நின்றே. 

பாடல் எண்:- 670

ஆதார மாவது மண்டந் தானாய்

அழகான பொன்னிறங்காண் மகமே ராகும்

நிராதார மாவதுவு மஷ்ட வெற்பு

நெறியதுநி தானமெனுஞ் சிவரூ பங்காண்

சூதான கயிலாச மீதா னத்தில்

தோன்றியநி ராதார சூக்ஷங் கண்டாய்

தாதுநிரா தாரமதிலா தாரந் தோன்றித்

தழைத்தவா தாரமதில் பிருதிவி யாண்டே. 

பாடல் எண்:- 671

வந்துதிக்கும் பிருதிவியி லன்னந் தோன்றி

வகையான அன்னமதில் மச்சை தோன்றிச்

சிந்தையுள்ள மச்சைதனி லுதிரந் தோன்றித்

திரமான வுதிரமதி லூனீர் தோன்றி

முந்திநின்ற வூனீரில் நிணமுந் தோன்றி

முதலான நிணமதில்சுக் கிலந்தான் தோன்றி

விந்துதித்த நாதமது மிரண்டுங் கூடி

விந்துகலந் தழைத்தவகை விளம்பி னேனே. 

பாடல் எண்:- 672

சென்னல்முத லானதவ விந்துங் கூடிச்

செழித்துலகந் தழைத்துபுவி வளர்ந்து மேவி

அன்னமயந் தன்னிலொரு அவ்வியந் தோன்றி

அவ்வியத்தி லசத்ததீ வுகளுந் தோன்றி

முன்னைவருந் தாதுவினில் நாற்காற் செந்து

மேலானபக்ட்சிநரர் தாப ரங்கள்

சொன்னவிந்தி லமைத்தஜீவ ராசி யோடு

தொல்லுலகி லூர்வணவுந் தோன்று மாண்டே. 

பாடல் எண்:- 673

ஜெனித்தவகை யெவ்வாறு விளம்பக் கேளீர் 

ஜெகந்தழைக்க எழுந்த பரஞ் சிந்தை கூர்ந்து

மனித்தசதா சிவனையருள் புரிந்து மேவும்

மகத்துவசதா சிவனுமயேஸ் பரற்குச் சொல்லத்

தனித்துமயேஸ் பரனும்ருத்தி ரற்குச் சொல்லச்

சாதகமாய் ருத்திரன்மா லுக்குச் சொல்ல

இனித்திருந்த திருமாலை யழைத்து ரைக்க

எழுந்தருள நாலுலகுந் தழைத்த தாண்டே. 

பாடல் எண்:- 674

மண்டலமுந் தழைக்கஅயன் நினைத்த போது

மருவுமுமை யாளுடையா ளன்னை யானாள்

நின்றஅய னந்தவட்டப் பீட மானார்

நேராகு மோரெழுத்து நாத மாச்சு

அண்டமதில் நின்றசதா சிவன்தான் காணும்

ஆதிபர நாதமதில் விந்துவானார்

என்றிருவர் மனமகிழ்ந்து லிங்கத் துள்ளா

யிருந்துலகம் ஜீவசெந்து தழைத்த தாண்டே. 

பாடல் எண்:- 675

திருமாலு மூலமதாய் நின்று மேவிச்

செழித்துஅவன் லிங்கமதாய் வளர்ந்து ஓங்கிக்

கருவான சத்தியது நாத மாச்சு

கருதும்பரா பரமெனவும் விந்து வாகும்

மருவான சிவனுமையும் நாத விந்து

மண்ணிலெழு தாபரமும் வளர லாச்சு

உருவாகு முகில்நாதந் துளியே விந்து

உவந்துலகந் தழைத்துயிரு மெடுத்த தாண்டே. 

பாடல் எண்:- 676

என்றுமுள்ள படிபுவிகள் தழைத்த வாறும்

எண்ணரிய ஜீவசெந்து வளர்ந்த வாறும்

கண்டறியும் ஜெகம்படைத்த கருத்தின் வாறும்

கருவிகர ணாதிமுதல் செனித்த வாறும்

ஒன்றுபொரு ளொன்றறிந்து வளர்ந்த வாறும்

உள்ளுணர்ந்து பாராதா ரறிந்த வாறும்

தெண்டிரையில் விளங்குகின்ற பரத்தின் வாறுந்

திருவுளத்தால் நினைக்கஇந்தப் படிதா னாண்டே. 

பாடல் எண்:- 677

படர்ந்தெழுந்த புவிதனிலு மாண்டே கேளீர் 

பலநூலுஞ் சாஸ்திரங்கள் விதிக்க வேண்டிச்

சடைமுடிமேல் தரித்தருளும் பரத்தை நோக்கித்

தாளிணையில் விழுந்துபிரமா சரணஞ் செய்து

திடத்துடனே ஜெகந்தழைக்கத் திருத்தி மேலாம்

திதிவாரம் நாள்கள் திங்கள் கூறுவோம்நாம்

விடுத்துவினி யதில்விதிப்போ மியல்பாய்த் தானும்

மெல்லடியில் விழுந்துவாய் புதைத்து நின்றான். 

பாடல் எண்:- 678

அடியில்விழுந் தெழுந்துபரா பரனை நோக்க

ஆதிபரா பரனுமவ ரேது சொல்வார்

கொடியமகா மேருவெனும் வரைதா னுள்ளே

குடியிருந்த முப்பாழுக் கப்பாலே தான்

படியுமொரு ஆறுவரை அதிகந் தோன்று

பகர்ந்தவரை கடந்தந்த வட்டத் துள்ளே

முடிவிலொரு வரைதோன்றுஞ் சூக்ஷத் துள்ளே

முதல்வேதம் பரையதுக்குள் முடிந்த தாண்டே. 

பாடல் எண்:- 679

அரன் மொழியைக் கேட்டுஅய னாண்டே கேளீர் 

அடுக்கான அகண்டவெளி யதனி லேதான்

வரமளித்து வானிலெழு லிங்கத் துள்ளே

வகுத்துரைத்த சரஸ்வதியின் கருவி லேதான்

திருவிருந்து விளையாடும் விரிவுக் குள்ளே

செழித்தசுழி யொடுங்குகின்ற பரையை விட்டு

அறிவறிந்த பலநூல்கள் புவியி லேதான் 

அறிந்தமட்டும் வகுத்துரைத்துப் பிறந்தே னாண்டே. 

பாடல் எண்:- 680

பரையைவிட்டு நானுதித்து வந்த மாத்திரம்

பகர்ந்தெழுந்து அய்யரென்னை யுகந்து மேவிக்

கரையடங்கா லிங்கமதைப் படைத்து வைத்தோம் 

கருதுகின்ற சரியையுடன் கிரியை யோகம் 

துரையறிந்த ஞானமிது நாலுவேதஞ்

சொல்லிவைக்க வேண்டுமென்று வேண்டி னார்கள் 

நிறையறிந்து அவரவர்க்கு லபித்தா ரீசன்

நீள்புவியி லிப்பிறப்பு மிரண்டும் போச்சே. 

பாடல் எண்:- 681

இந்தமொழி ஐயரென்னைப் பார்த்து மேவி

எடுத்துரைக்கப் பார்த்தடிமை யியம்புங் காலை

யெந்தைபிரா னீயாச்சு நீநா னாச்சு

எனைவகுத்த பரைக்குள்ளே யிருந்திட் டேனான்

சந்தேகஞ் சொல்லஇனி வேண்டா மென்று

தாள்பணிந்தெ ழுந்துநின்று கரங் குவித்து

விந்துதனி லேபிறந்த ஜெனன மாச்சு

மேலான பலவிதமாய் விதித்தோ மாண்டே. 

பாடல் எண்:- 682

வேதமெனும் புராணநூல் விதிக்கச் சொல்லி

விளம்புகின்ற ஐயரடி விழுந்து போற்றிச்

சாதகமாயொருவிபரம் புகல்வேன் காணுந்

தரணிதனில் செந்துவெல்லாந் தழைக்க வேண்டிப்

போதகமா யுங்களையான் புகழ்வே னாகில்

புவிதனிலு மதுகண்டு துதிக்க வேணும்

ஆதரமண் டலத்தினில் நீர்போ மென்றும்

அருள்புரிய வேணுமென்று மர்ச்சித் தேனே. 

பாடல் எண்:- 683

திருவடிப்பொற் பதம்போற்றித் துதித்தேன் யானுந்

தேவசிவ சாம்புவனார் பட்டந் தந்தார்

பொருளாகுந் திருமால்கார் முகிலு மானார்

புகழ்ந்துருத்திரன் அக்கினியு மின்ன லானார்

சிறப்பான பதினாறாம் வீட்டுக் குள்ளே

சிறந்தமயேஸ் பரரிடியுங் காற்று மானார்

மறப்பாக நின்றசத்தி நாத மானாள்

மரூவுபர வெளியுமது மேக மாண்டே. 

பாடல் எண்:- 684

துய்யவெளி யருந்ததியின் குலந்தா னாகுஞ்

சொல்லுகிறே னவனைவர வழைத்து யானும்

வையகத்தோர் புகழ்ந்தேத்த வூனுக் குள்ளே

வகுத்திருப்ப தேழுநக்ஷத் திரமு மாகும்

ஐயமறும் வானில் நக்ஷத்திரங்க ளெல்லாம்

ஆதிசதா சிவனருளா லான வாறும்

செய்யபுக ழன்னமதில் நின்ற வில்லுஞ்

சிறந்தருளுஞ் சிற்பரையால் வளர்ந்த தாண்டே. 

பாடல் எண்:- 685

அவையதுக்குள் ளேயேழு வார மாச்சு

அவள்குலமென் றென்குலத்தி லமைத்த வாறும்

இவையடக்கத் தாலுஞ்செழுந் திதிக ளாச்சே

எனைவகுத்துப் பரைக்குலத்தி யம்ப லாச்சு

திவையடக்கத் துள்ளிருந்த பிரமத் துள்ளே

செயலான சராசரமும் பிறக்க லாச்சு

தவமிகுந்த வப்பிரமப் பிரபை யுள்ளே

தனித்ததொரு சுக்கிரனா ருதித்த தாண்டே. 

பாடல் எண்:- 686

திங்களுடன் திதிவாரம் வகுத்த பின்பு

திருவுள்ளத்தின் கமலமலர் பணிய யானும் 

சங்கரனா ரெனைமகிழ்ந் தேதோ வென்றார் 

ததியினுட னறிந்துலகந் தழைக்க வேணும் 

இங்கிதமா யிதுக்கெவரை வைப்போ மென்று

எழுந்துகரங் குவித்தடியேன் பணிந்து போற்றிக்

கங்கையணி கடவுளர் மதியு மானார்

கருத்திலறிந் துவமையென மகிழ்ந்திட் டேனே. 

பாடல் எண்:- 687

செங்கதிராய்ப் புவிதனிலுஞ் சூழ்ந்து மேவுந்

திருவுருவாய் நின்றுபரஞ் செப்பி னார்காண்

அங்கெனவே யானறிந்து அறிவி னாலும்

அருளறிந்து அரூபநிலை யானும் பெற்றேன்

பொங்கமுடன் புகழ்ந்திருந்தேன் பொருளுங் கண்டேன்

பூரணத்தை யொருநாளும் போக்கா வண்ணம்

எங்கள்மதி யிருந்ததினா லெல்லா மாச்சு

வெம்பிரா னியம்புநிலை யான்கண் டேனே. 

பாடல் எண்:- 688

சொன்னமொழி கேட்டெழுந்து சிறுபெண்ணாத்தாள்

திருவடிதன் கமலமலர் துதித்து மேவி

என்னமொழி நீருரைத்தீ ரென்பிரா ணேசா

எனக்கடிமை யுனையன்றி யினியொன் றில்லை

இன்னிலத்தி லிருளகற்றி வெளியைத் தாண்டி

யெழுந்ததொரு கடிகைமுப் பதிலு மாகும்

அன்னவெளி தனையறுக்கத் தோணு வீர்காண்

அடியாளுந் தனித்திருக்க மாட்டி லேனே. 

பாடல் எண்:- 689

தனித்திருக்கத் தரமென்று வுமைதா னோக்கி

சச்சிதா னந்தபர மேது சொல்வார்

செனித்தபுவி விளங்குங்கலை பதினாறாகில்

சேர்ந்திருப்போ முன்னிடத்திலகலா மற்றான்

கனித்தகலை யொன்றாக நாளொன் றாகக்

கருதிடுமூ வஞ்சான ளாகும் போது

செனித்தவுயிர் யாதுக்குங் குளிர வென்னில்

தெரிந்தொருநாள் பிரிந்திருப்போ மறிவிராண்டே. 

பாடல் எண்:- 690

துய்யபர மானசிவம் விளக்க மேவித்

தொழுதுமையாள் வணங்கிச்செங் கதிரு மானாள்

வையகத்தி லிருள்தனையே யறுத்துச் சுட்டு

மதியதனால் வெளியாகி யொளியாய் நின்றாள்

ஐயமற இருவருந்தா னாகா சத்தில்

அகிலபுவ னந்தழைக்கப் புட்பம் போலாய்

வெய்யவனும் வெண்மதியு முலகந் தன்னில்

வீற்றிருந்து புவனமெல்லாம் விளங்கி னாரே. 

பாடல் எண்:- 691

சத்தியுடன் சிவனுங்கதிர் மதியு மாகித்

தனித்தபிரமா வெழுந்துகரங் குவித்து மேன்மேல்

முத்திதரு முதலெழுத்தே தேவ தேவா

மூன்றுலகும் நிரந்தரமாய்ப் படைக்கச் சொன்னீர்

எத்திசையுஞ் சரிசமனாய் விதித்து வைத்தால் 

எங்கள் சொல்லு மேலாக வேணுந் தானாய்

இத்தலத்தி லுள்ளோர்க ளெனைத்தான் போற்ற

வெழுபரத்தி லொருபுதுமை யருள்தா னென்றே. 

பாடல் எண்:- 692

அந்தணரு மடியிணையைத் தொழுது மேவ

அம்பரவி லாசருமே யருளு நேர்மை

விந்துபர நாதமது மொன்ற தாகி

விளைந்ததுகா ணெண்பத்து நாலு லக்ஷம்

செந்ததுக்குள் செனித்துயிராய் நிறைந்து மேவிச்

செகதலத்தி னமதுயிர்க்குஞ் சேர்க்கை யில்லா

எந்தவித மாகவுந்தான் புதுமை யுங்கள்

இடத்திலுற்தான் தருணமென் றியம்பி னாரே. 

பாடல் எண்:- 693

தரவரிது என்றபரந் தன்னை நோக்கித்

தாள்பணிந்து கரங்குவித்துச் சதுர்பிர் மாவும்

வரைதனிலும் நின்றபரம னகம கிழ்ந்து

வள்ளலெனுந் திருபரைக்குள் வகுக்கச்சொன்னார்

திருமறைக்கு ளிருந்தவரை வெளிய தானோந்

திருவுளந்தான் கருத்துகந் தெனைத்தா னோக்கி

அரைபுகுந்து அந்தனர்கள் புதுமை கண்டு

அந்தரத்தி லறிந்துகொள்ள அருளென் றாரே. 

பாடல் எண்:- 694

அந்தரத்தி லொருபுதுமை  யருளுஞ்சொல்லு

அரனடியைப் போற்றிநின்றா ராண்டே கேளீர் 

சுந்தரமாந் தும்பிசுக்கிர வார நாள்தான்

சொல்லிமந்த வாரமெனுஞ் சூக்ஷ மானார்

தந்திரமாஞ் செங்கதிரோ னாதி வாரம்

சர்வவுயிர் நாதனருள் சோம வாரம்

மந்திரமங் களவாரம் ருத்திர னாகும்

வளர்ந்தபுதன் மயேஸ்பரன்தான் வகுத்தே னாண்டே. 

பாடல் எண்:- 695

அந்தரத்தில் நின்றகுரு வாரந் தன்னில்

ஆதிசதா சிவனருளா லகமே ழாகும்

விந்தையதா மவரவர்க்கு வார நாள்தான்

விளங்கினோம் விபரமாய் விளங்கக் கேளீர் 

பைந்தமிழா லருளியதோர் ஞான வாக்கியம்

பரமான அகத்தீசர் பகர்ந்த வண்ணம்

இந்தவித நூல்வகையை விதித்தேன் காணும்

இனியுரைக்குஞ் செய்தியெல்லா மியம்ப லாமே. 

பாடல் எண்:- 696

வாரமினி யேழதனை வகுத்த பின்பு

வள்ளல்பரந் திருமாலை யருகே வைத்து

ராகுடனே கேதுஅணி யாகு மென்னில்

நளினமல ரடியதனைப் போற்றி செய்வார் 

தாரகமாம் பிரமநதி தீர்த்தந் தன்னைத்

தனித்தொருநாள் திரிகடுகை மறிப்போ மென்றார்

ஆரணிந்தோர் சம்மதித்து அருள மேன்மேல்

அந்தணர்கள் கண்டுகொள்ள அருள்செய் தாரே. 

பாடல் எண்:- 697

பூரமுட னுத்திரமு மஸ்தஞ் சித்திரை

புகழ்சோதி விசாகமது அனுஷங் கேட்டை 

சீரான மூலரோ கணியு மென்னில் 

செயசதைய முத்திரட் டாதி யென்னில்

ஈராறுங் கூடிநக்ஷத் திரம தாச்சு

எழுந்துவளர்ந் திருக்குமினி யியம்புங் காலை

கார்வடியு மாகின்ற பிர்மா வுக்குக்

கருத்துலகம் பிரித்துரைக்கக் கருதினாரே. 

அசுவனியும் பரணிகார்த் திகையி னோடு

அருள்மிருக சீரிஷந்திரு வாதிரையு மாகில்

திசைபுகழு புணர்பூச மாயிலியத் தோடு

சிறந்தமகம் பூராட முத்தி ராடம்

நிசமான திரிவோண மவிட்டம் பூரட்

டாதிரேவதியு மூவஞ்சு நேர்ந்த தாகில்

விசுவதிசெங் கதிரதனில் வளர்ந்து மேவும்

விரித்துலக மந்தணர்க்குப் பிரித்துணர்வ தாமே. 

பாடல் எண்:- 698

கண்டுகொள்ளு மந்தணர்கள் புவியிற் குள்ளாய்க்

கருத்தாலும் வகுத்துரை த்துக் காலம் போக்கும்

என்றுபரஞ் சொல்லியருள் புரிந்த மாத்திரம்

இணையடியிற் போற்றிசெய்து எழுந்து பின்னும்

நன்றெனவுங் கரங்குவித்துப் பிர்மா வுக்கு

நாயனா ருரைத்தபொரு ளிதுதான் கண்டீர்

வண்டர்கள்தான் புவியதுக்குள் பிறந்த பின்பு

மனதாலும் வகுத்துரை த்தார் வேதந் தானே. 

பாடல் எண்:- 699

வேதமறை யாகமங்கள் பிறந்த தெங்கே

வேள்விகன லுதித்தவிதம் படையிற் குள்ளே

கதிர்முனையு முளைத்ததெங்கே ரவிதா னெங்கே

கமலரவி யுதித்ததுவும் பரையிற் குள்ளே

போதநதி கிரியுமலை வனங்கள் தானும்

புகழனந்தம் பிறந்ததெந்தன் பரையிற் குள்ளே

தீதில்லாச் சங்கரனா ரயன்மால் ருத்திரன்

தேவர்களும் பிறந்ததெந்தன் பரைக்கு ளாண்டே. 

பாடல் எண்:- 700

அந்தணரும் வேதியரு முதித்த தெங்கே

ஆசாரம் பிறந்ததெந்தன் பரையிற் குள்ளே

விந்துதித்துப் பிறந்ததெங்கே நாத மெங்கே

வெகுவிசித் வுயிர்களெந்தன் பரையிற் குள்ளே

செந்தணலும் பிறந்ததெங்கே ஜெகந்தா னெங்கே

ஜெகதலமும் பிறந்ததெந்தன் பரையிற் குள்ளே

மந்திரமும் பிறந்ததெங்கே மனுக்க ளெங்கே

மனுநீதி பிறந்ததெந்தன் பரைக்கு ளாண்டே.