திருவள்ளுவரின் ஞானவெட்டியான் பாடல் எண் 1901- 1913 முற்று பெற்றது

பாடல் எண்:- 1901

மேல்கீழும் வாசி விரும்ப வொருவழியாய்க்

கால்வாங்கிப் பாயாது காலையதும்- மேல்கீழும்

சுவாசமது மோடாது சொக்கா தசவெனவும்

உவாசமது வூதுமோ டாதே.

பாடல் எண்:- 1902

அன்னமய மதித மடிக்கடிதா னாகாது

வின்னம் பரவிபழ மேலுஞ்- சொன்னேன்காண்

பசும்பாலுஞ் செய்கையொன்று பாலாகா மற்றொன்று

வீசாவின் பாலொன்றே மேல். 

பாடல் எண்:- 1903

வருஷமூ வாண்டில் வாசிகொண்டு தாரை

உருவேற்றங் கண்டங்கி யுபாயமதாய்- வருஷமாம்

கீழிருந்து மேலுங் கீழ்மேலும் பாயும்விதம்

பாய்வீட்டைச் சுத்திசெய்து பார். 

பாடல் எண்:- 1904

வாசி யடங்கவுமுன் மலசுத்தி சலசுத்தி

பேசினது ஞானவெட்டிப் பேசும்- வாசியது

ஒன்பது வாரகுழி ஓடாது சுவாசமது

மென்குருக டாட்சமெனு மேல். 

பாடல் எண்:- 1905

ஆதியொரு வாண்டி லழுக்குகளெல் லாமுறியும்

பேதியிலை யுண்டமுரி பெருமைகாண் ஆதியிலும்

முழுவயிரமுன் னாண்டில் முக்காலாம் பின்னாண்டில்

பழுதிலைமூ வாண்டுவரை பார். 

பாடல் எண்:- 1906

அரைவயிறு சாதம் புக்கடியு மாகாது

துரையதுவு மொருவேளைச் சொன்னோம்- அரைவயிறு

அதினாலு மாவதென்ன அமுரிபிடி யன்னம்

மெதுவாக அன்னமுண்ணு மேல். 

(விருத்தம்)

பாடல் எண்:- 1907

முன்மலமெ லாமொழிய லவணம் போச்சு

உனதுசட மாதிதமுந் தங்க மாச்சு

தன்மயமா யெடுத்தவிதஞ் சரிதா னாச்சு

தந்தையில்லாச் சன்மமெப் படியுண் டாச்சு

உன்மயத்தா லுனக்குதந்தை யுருதா னாச்சு

உப்புஅந்தப் படிவிதங்காண் யோகி யாச்சு

மன்மதங்கா ணீசனுட மவுன மாச்சு

மயமான நித்திரையை மாற்றி னாரே. 

பாடல் எண்:- 1908

மாற்றினார் மும்மலத்தை வாரி சூழ

மலப்புளியுஞ் சலமதனால் மதியி னாலும்

ஏற்றினார் சரமாரி மாலின் பாணம்

இந்திரிய மெனுமமுரி ராம பாணம்

தூற்றினார் போலுமிது அறிவே னாகில்

சொற்பேதங் குருபேதஞ் சொல்வா ரில்லை

நீற்றினா ருப்பதுவும் நீறிப் போச்சு

நீற்றினத்தை வடிரவியில் நீர்போ மாண்டே. 

பாடல் எண்:- 1909

இந்தவிதந் தொண்ணூற்றாறு கருவிற் சுட்டு

எண்சாணு தேகமதி லிருந்த சுவாசம்

வந்தஎதிர் மனிதர்களை விழியால் பார்த்து

வகையதுபோ லுட்கருத்து மணிதீ பங்காண்

உந்தன்வழி யொன்பதுவு மொளித்துப் போச்சு

ஒருவழிகாண் போய்வரவும் வாசி யாச்சு

வெந்தணலால் கட்டியதோர் வாசியோகம்

மேலான யோகம்கடந் தோர்க ளாண்டே. 

(வேறு- விருத்தம்)

பாடல் எண்:- 1910

இருபத்தோ ராயிரத்து அறுநூறு

சுவாசமது மெல்லா மொன்றாய்க்

கருதிரண்டு வுருவதுபோல் பத்தாண்டு

கடந்துதச தீட்சைக் கப்பால்

அருவுருவாய் நின்றசவு சரிப்படுங்காண்

குறைந்ததெல்லா மாண்டே கேளீர்

குருவருளால் யோகயென்ற வழிபெற்ற

துறைகளெல் லாங்கூறி னோமே. 

பாடல் எண்:- 1911

அஞ்ஞானம் போக்கிசிவ மெய்ஞ்ஞானத்

துறையறி வனேகங் காலம்

விஞ்ஞான வந்துசொல்லுந் தயிலமுறை

யறிபவராய்த் தேவ ஞானி

சன்னாசி மகத்துகள்தான் வசியமெட்

சணிசெய்வார் சாஸ்திரஞ் சொல்வார்

எஞ்ஞான முழுதுமறிந் திருப்பவர்க

ளவரிடத்தெட் சணியும் வாழ்வாள். 

(விருத்தம்)

பாடல் எண்:- 1912

வாதவயித் தியஜோஸ்ய மாந்தி ரீகம்

மறுபிறவி ஞானசிவ வாழ்க்கை தன்னில்

ஜாதியிலும் வம்மிசவான் கல்வித் தானால்

தசதீட்சை சுயம்புவெகு வர்ணங் காணும்

சோதியிது வயதுநூறு பிறவி யானால்

செகமதிலுஞ் சிவயோகி செல்வ வானாம்

சோதிமணி தீபவொளிப் பிரகா சத்தில்

சுரூபமணி நிரூபமதி சுயம்பு முத்தர். 

பாடல் எண்:- 1913

முத்துநவ ரத்தினம்போல் முடிந்த சூட்சம்

முன்னோர்கள் பதினெண்பேர் கமலம் போற்றி

சத்திசிவ தீட்சைபத்து மிரண்டும் வாழி

சனகாதி மாமுனி சித்தர் வாழி

பத்துநூ றாயிரத்து மேலா மிந்நூற்

பரிபூரண சொச்சமெனு மிருபத் தெட்டும்

வித்தினால் விளைவான சகஸ்திர கனநூல்

வேதாந்த ஞானவெட்டி விளக்க முற்றே.