திருவள்ளுவரின் ஞானவெட்டியான் பாடல் எண் 101- 200

பாடல் எண்:- 101

நகாரமகார மிரண்டையுஞ்சேர்த்து

நடுவேசதுஷ்கோண வீட்டையுங்கட்டி

சிகாரவகார யகாரமதுகொண்டு

சித்திரச்சாவடி விஸ்தாரமாகவும்

அகாரமதுக்குள்ளே யையுமென்றட்சரம்

அவ்வெழுத்தாலே யகண்டசராசரம்

உகாரமதுக்கு ளுயர்ந்தகிலியெனும்

உவ்வெழுத்தாலு முதித்தசவ்வானதும்- வீடு. 

பாடல் எண்:- 102

வஞ்சகமான தோராஞ்சுபெரும்பூதம்

பஞ்சறிவாகவுங் குஞ்சரவீட்டினில்

அஞ்செழுத்துள் வளரைம்பத்தோரட்சரம்

ஆனந்தமாக வலங்காரமாளிகை

கொஞ்சிவிளையாடும் ரஞ்சிதவீட்டினில்

நெஞ்சறியுங்கமலாலயமைம் பொறி

செஞ்சொல்மொழிசிவசிங்கா தனத்தினில்

கஞசமலராயிரத் தெட்டிதழினால்- வீடு. 

பாடல் எண்:- 103

நாலுமுழத்தினுங்காலை வளர்த்தியே

நாட்டியேசக்கரம் பூட்டியேவைத்துடன்

மேலுமீரைந்துடன் தாதுவினாடியால்

வீட்டுக்குஆக்கையைப் பூட்டிவருந்தியே

மாலுநடுவனை காலுமடியனும்

பாலுமதிவளர் மேலுஞ்சுடரினால்

மூலவன்னிச்சுழி மூவரிருப்பிடம்

வாலைகுண்டலிதன் மாளிகையாச்சுது- வீடு. 

பாடல் எண்:- 104

நாடித்தசவாய்வு வீரைந்துஞ்சேர்த்துமே

நாடியஷ்டதிசையு நலமாகப்பூட்டியே

வீட்டுக்குவாசலொன்பதுவு முண்டாக்கியே 

வேடிக்கையாகவுநாடி நரம்பாலே

காட்டியசுக்கில சுரோணிதத்தாலே

கருவியெனுங்கரணாதிகள் சூழ்ந்திடில்

ஆட்டியமுட்டுமுடக்குக் கணுவுக

ளாக்கைப்பலப்பட நாக்குவுண்ணாக்குடன்- வீடு. 

பாடல் எண்:- 105

சிங்காரமான வரண்மனையஞ்சையும்

சிற்றம்பலத்துடன் பேரம்பலங்களும்

கங்கைநதிகளுந் தொண்ணூற்றறுவர்

கலந்தேயிருக்குங் கனகசபையெனும்

அங்கங்குறைவுபடாம லரண்மனை

அச்சூடுகட்டியே மச்சூடுஆலயம்

எங்கும்பிரகாசிக்கும் மிந்திரியவீடு

இடைபிங்கலைசுழியேகா க்ஷரத்தினால்- வீடு. 

பாடல் எண்:- 106

ஐந்துபுலனையறிவாகக் கூட்டியே

ஆதாரமாறும்வளை தனை நாட்டியே

கைந்துமதசுழி கற்பத்தையூட்டியே

கால்கொண்டுநின்றொரு மேல்கொண்டுவாங்கியே

பைந்தமிழ்சூஸ்திர நாடித்திசைக்கயிறு

பாங்குடன் கப்பிக்கயிறுமூன்றும் பூட்ட

ஐந்துபூதத்தைக் கொண்டாக்கைபிலப்பட

ஆறூருண்டாக்கியனேக விசிதமாம்- வீடு. 

பாடல் எண்:- 107

சுற்றுமதில்களுமா றற்சுவருடன்

துண்டுகளாகிய தண்டிகைக்கம்புகள்

பத்தியால்நின்றதோர் சித்திரச்சாவடி

பார்க்கிறபேர்க்கெலாஞ் சீர்க்கலங்காரமாய்

முத்திதருஞ் சிவசித்திரமண்டப

மோட்டுவளையு நரம்பாவிறுக்கியே

சத்தமெனுநவரத்நக் கதவுடன்

சந்நிதிவாசலிலுன்ன தமாகவே- வீடு. 

பாடல் எண்:- 108

நவ்வையுமவ்வையும் ரெண்டையுஞ்சேர்த்து

நலமான அவ்வையும்வவ்வையுங் கூட்டியே 

சிவ்வையுஞ்சேர்த்துடனா சாரிகையில்

திடமாயெண் சாணுடல்தேகமதாகவே

அவ்வதுக்குள்ளே யாதாரமுண்டாச்சுது

அம்பிகைப்பெண்ணவளாலே வீடாச்சுது

உவ்வதுக்குள்ளே யுடலுமுண்டாச்சுது

ஓங்காரத்துள்ளே யுயிர்வந்துலாவுது- வீடு. 

பாடல் எண்:- 109

திங்களொன்றானபின் மூங்கின் முளைபோல்

திரண்டுருண்டே கனியாகுங்கருவுரு

சிங்காரமானதோர் திங்களிரண்டினில்

சேர்ந்துகலந்தது பாலாடைபோலவும்

இங்கிதசுக்லசுரோணிதமாகிய

இந்திரியவச்சிரவின் பவீடாமதில்

தங்கியநாதவிந்தாலே சமைந்த

சடமதின்வாறினைச் சாற்றுவனாண்டேகேள்- வீடு. 

( விருத்தம் )

பாடல் எண்:- 110

மூலமதில் வீடொன்று முடிந்த தாண்டே

முச்சந்தி வீதியதும் புறம்பாய் வைத்து

சீலமுள்ள பிரமனுக்கும் வீடொன் றாச்சு

சிறந்தருளுந் திருமால்தன் வீடொன் றாச்சு

ஞாலமதில் ருத்திரன்வீ டொன்றே யாச்சு

நலமான மயேஸ்பரன்தன் வீடொன் றாச்சு

ஆலவிட முண்ட சதா சிவனா ருக்கும்

அரண்மனையு மொன்றாச்சு ஆண்டே கேளே. 

பாடல் எண்:- 111

மருவுயர்ந்த வதனத்தி னாத சத்தி

வடிவான மரகதப்பெண் மாது வாலை

திரிபுரத்துக் கொருபுறமா யிலகுஞ் சோதி

சிற்பரத்தி தற்பரத்தி சிறுபெண் ணாத்தாள்

சுரிமுகத்தி னகதனத்தி துடியி டைச்சி

துலங்கும்ரத்ன மானதொரு சோதி மாது

அருமறைச்சி யம்பரத்தி யம்பி கைக்கு

அரண்மனையு மண்டபமுஞ் சமைந்த தாண்டே. 

பாடல் எண்:- 112

குருவுடனே சீஷனுந்தான் வாழ்ந்த வீடு

கூறான விந்திரியந் தரித்த வீடு

அரூபியெனு நாதாக்கள் துதிக்கும் வீடு

அளவற்ற வைம்பூதம் வாழ்ந்த வீடு

பருவமெனும் ஞானசிவசத்தி வீடு

பண்ணுமறைக் கெட்டாத நாத வீடு

கருவிருந்த ஞானவிந் திரிய வீடு

கட்டிவைத்தான் திருமால்தன் கயிற்றா லாண்டே. 

பாடல் எண்:- 113

அடிநடுவு முடியுமொரு வெண்சா ணீளம்

அங்குலமுந் தொண்ணூற்றா றாண்டே கேளிர்

கொடியமகா மேருவெனும் வளர்ந்த வீட்டில்

குடிலமங்கு லத்துக்கோர் கருவி யாகும்

படியான பதினெட்டாங் கோட்டின் மேலும்

பலபலவாய்க் கருவிகளு மமைத்த தாகில்

முடிசிறந்த ஜெகநாத ரருளி னாலே

முடிந்ததுகாண் பெரும்பரத்தி வீடு மாண்டே. 

பாடல் எண்:- 114

சரியையுடன் கிரியைசிவ யோக ஞானந்

தன்னையினிச் செய்திருக்கு மாத்தாள் வீடு

வரிசைதந்து விளையாடு மாதி வீடு

வளமான கருவியெல்லாம் வளர்த்த வீடு

பெரியநரம் பெழுபத்தீ ராயி ரத்தில்

பெருநாடி பெலத்தநரம் பான தாலே

பரிபூர்ண வம்பிகைப்பெண் ணிருந்த வீடு

பாகமதா யமைத்துமுடிந் தாச்சு தாண்டே. 

பாடல் எண்:- 115

ஒன்றிரண்டு திங்களில் கருவு மூறி

யொருமூன்று திங்களில் ரூப மாகிக்

கன்றுசது ரஞ்சுவிரு மூன்றில் தானுங்

கருத்துடனே யிடைநாசி மார்பு மாகி

என்றுரைத்த வேழுதிங்க ளெட்டுக் குள்ளே 

யெண்ணரிய நாதவிந்து வுருவே யாச்சு

அண்டபிண்ட மகண்டமதா யமைந்து மேலு

மலங்கார வீடாகச் சமைந்த தாண்டே. 

பாடல் எண்:- 116

ஆக்கையெனும் தசநாடி நரம்பி னாலே

யடி நடுவு முடியுமா தார மாசித்

தீர்க்கமுள்ள யோனிசித்திர மதிலும் வீடுஞ்

சிவசமயத்தினருளாலே யமைத்த வாறு

மேற்கயினி யுளுத்ததொரு வுப்புப் பாண்ட

மிப்படியே சடமதுவால் வீடு மாச்சு

பார்க்கவொரு சிங்கார விசித மாகும்

பன்னிரெண்டாங் கோட்டில்வந்து பதிந்ததாண்டே. 

பாடல் எண்:- 117

நாலாச்சு ஆறாச்சு வீரைஞ் சாச்சு

நலமான வீராறு மீரெட் டாச்சு

மேலான விரண்டாச்சு இதுக்கப் பாலும்

வெளிகடந்து வொன்றாச்சு வுருவு மாச்சு

காலாச்சு கையாச்சு வயிறு மாச்சு

கட்டியொரு வீடாகச் சமைந்த வாறும்

சீலமுள்ள சிங்கார விசித வீட்டில் 

சித்திரத்தின் பதுமையைப்போற் செனித்த தாண்டே. 

ஆறாதாரவகை இந்திரிய விவரம். 

 ( தரு )

அடையாளஞ்சொல்லுகிறேன்- ஆண்டையேகேளீர் 

அடையாளஞ்சொல்லுகிறேன். 

பாடல் எண்:- 118

பிருதிவியப்புவுந் தேயுடன்வாயும்

பேரானவாகாச மைந்ததையும்கூட்டிக்

கருத்தில்வளருஞ் சுழிமுனைவீட்டினில்

கண்டுபுறமாக நின்றதுஆண்டையே

நிருவிகமலத்திதழாயிரத்தெட்டு

நிர்க்குண நிர்மலநேர்மையிதாகையால்

மருமலர்சூழ்திருமாலின் பதிவளர்

மாமதுரக்கனி வாழ்க்கையுமிப்படி- அடை. 

பாடல் எண்:- 119

தோத்திரமாவது வாக்குடன்சட்சுவுஞ்

சிங்குவையாக்கிராண மைந்தையுங்கூட்டிப்

பாத்திரமான செவியுமுடம்புகள்

பாங்கான நாக்கதுமூக்குமேயாச்சுது

சத்தபரிசமும்ரூப ரசகெந்தஞ்

சார்வாகுமீதொரு வைந்துமேயாச்சுது

சித்தமுங்கேள்வி சுகதுக்கரூபங்கள்

சேர்ந்த வறுசுவைநாவதுமேருசி- அடை. 

பாடல் எண்:- 120

சந்தனங்கெந்தஞ் சவ்வாதுபனிநீர்

சாந்துபுனுகு களபகஸ்தூரியும்

சிந்தைமகிழவே கண்டுகளிக்குஞ்

செழுந்திருநாசி சுகதுக்கநித்திரை

பைந்தமிழ்வாக்குடன் பாணியும்பாயுரு

பாங்காயுபஸ்தமைந் தாச்சுதுபாகமாய்

அந்தமுங்கால்பரபான முந்தாரணை

யைம்புலனாவலும் லிங்கமிதாண்டையே- அடை. 

பாடல் எண்:- 121

வசனங்கமன ந்தானவிசர்க்கம்

வாழுமேயானந்த மைந்திதுங்கூடியே

நேசமும்வார்த்தை நடக்கைக்கொடுக்கும்

நீருமலமுமாதாரமீ தாச்சுது

நேசமனபுத்தியாங்கார சித்தமு

நேராயிதுநாலு நின்றுநடக்கையால்

ஓசைநினைத்திடும் புத்திவிசாரிக்கு

மோங்காரக்கோபமுஞ் சித்தம்பொருந்திடும்- அடை. 

பாடல் எண்:- 122

உருவமுங்கொண்டு வுலகெங்குஞ்சுற்றி

யுழன்றுவுழன்று வுணர்ந்துதவிப்பதும்

அறிவொன்றுழன் றுமேயாக தத்துவமு

மையாறு முப்பதுமெய்யாகக்காட்டியே

கருவிலமைத்ததின் காரணசற்குரு

காட்டியதத்துவக் கட்டளையின் படி

திருவுருஞான சிவசத்தியம்பிகை

சின்மயசுரூப சிரோமயமாமது- அடை. 

( விருத்தம் )

பாடல் எண்:- 123

கங்கையெனுங் கதிர்மதியுந் தரித்த சோதி

கனகரத்ன மானுடனே மழுவு மேந்தி

பங்கையமா மறுகுதும்பை கொன்றை சூடிப்

பதினாறு கலையணிந்த மூலந் தன்னில்

திங்களெனும் புவனமெல்லா நிறைந்த சோதி

திரிபுர த்தைக் கனலாக வெரித்த வீசன்

செங்கநதி யென்றுதிரு மூலந் தன்னில்

செனித்தெழுந்த கருவியெல்லாஞ் செப்பு வேனே. 

பாடல் எண்:- 124

பூதாதி யைந்துநின்ற புகழுஞ் சொன்னேன்

புலனைந்தும் விபரமதாய்ப் பொறியுஞ் சொன்னேன்

சூதான கர்மவிந் திரியஞ் சொன்னேன்

சுகஞான விந்திரிய மைந்துஞ் சொன்னேன்

தீதான அந்தக்கரண நாலுஞ் சொன்னேன்

தெளிவான ஜெக நாத ரருளி னாலே

ஆதரவாய் நின்றதச வாய்வுஞ் சொன்னே

னதுகடந்து வறிவதற்கு வருள்செய் வேனே. 

பாடல் எண்:- 125

உணவறிந்து நினைவறிந்து வுணர்ச்சி கண்டு

உள்ளறிந்து புறமறிந்து வுரிசை கண்டு

மனமறிந்து மதியினின்று மகிழ்ச்சி பெற்று 

வசனமெனுங் கேள்வியதின் வாய்மை கேட்டுக்

குணமறியா தாசையினா லழிந்து நின்று

கூர்ந்துமன மெழுந்துவொரு கருமஞ் செய்து

நினைவுதவ றாமலொன்றாய்ப் படைத்து நின்றேன்

நிகருடைய தத்துவமுப் பதுஞ்சொன் னேனே. 

பாடல் எண்:- 126

சொன்னவகை தொகையறிந்து சொல்பே தங்கள்

சொல்லவில்லை தசநாடி தசவாய் வுந்தான்

இன்னமொரு வகையறுபத் தாறுஞ் சொல்ல

விவர்கள் நின்ற நிலைசொல்ல வீடுஞ் சொல்ல

விண்ணம்வரா திவர்கள்செய்யுந் தொழிலுஞ் சொல்ல

வேதாந்த மறியாத முடிவுஞ் சொல்ல

அன்னையெனு மம்பிகைப்பெண் ணருளி னாலே

யவதரித்து நின்றநிலை யருள்செய் வோமே.

( கொச்சகம் )

பாடல் எண்:- 127

மருவுதிருப் பொற்கமலம் வல்லபைதன் வீட்டிலொரு 

கருவுருவா யைம்பூதங் கலந்தே யொருபுறமாய்

அருவுருவாய் நாதவிந்து அறுகுநுனி மேற்பனிபோல் 

மருவியைம்பத் தோரெழுத்தில் வந்தவகை சொல்வேனே. 

பாடல் எண்:- 128

தாங்கிநின்ற மூலமதில் தானுமொரு வீடுகட்டி

வாங்கிநின்று வட்டமிட்டு மாறியிரு காலாக

ஓங்கி முளைத்ததுதா னொன்றே கொழுந்தாகி

நீங்காமல் நின்றகா ணெல்லிக் கனியாச்சே. 

பாடல் எண்:- 129

சத்தி யுதித்ததிருச் சன்னிதியின் முன்பாக 

முத்திதரு மெய்ஞ்ஞான மூவரனுக் கிரகமதால்

சுத்தியொரு பந்தலிட்டுச் சூழ்ந்ததச வாய்வுகம்பாய்ப்

பத்திபடர்ந் ததுகாண் பதினாலு லோகமதாய். 

( கலித்துறை )

பாடல் எண்:- 130

மாறிக் கலைகொண்டு வம்பர வீதியின் வட்டமதில்

தேறித் தெளிந்து வளைத்துக்கொண் டேன்தச வாயுவைத் தான்

ஊறி நடக்கின்ற பானத்தின் வாசி நுனிபிறழா

ஊறிக் கருவி லுறவாகி நின்று வுதிக்கின்றதே. 

பாடல் எண்:- 131

சாதியுங் கண்டுகுல மேவகுத் திந்தத் தாரணியில்

வாதிகள் தள்ளி வழக்குரைப் பார்மனு நீதிகண்டு

நீதியும் வேதநிலை கண்டுரைத்த நேர்வீட் டுக்குள்ளே 

சோதியைக் கண்டு வுறவாகி நின்று துலங்கினனே. 

( வெண்பா )

பாடல் எண்:- 132

அத்தி புரத்தி லருகிருந்த தாக்கையது

சத்திசிவ நாதவிந்து தான்கூடி- விந்ததுமே

மூலக் கருக்குழியில் முச்சந்தி வீதிவளர்

பாலகனா யுற்பவிக்கும் பார். 

பாடல் எண்:- 133

குருலிங்க சங்கமது கூறுமறு கோணவரை

இருமென் றழைத்து விருந்தங்கு- உருவாகி

நின்றறுபத் தாறு நிறைந்த கருவியெல்லாம்

கொண்டமைந்த வாறதனைக் கூறு. 

பாடல் :- 134

ஈச னுறவாகி யெங்குஞ் செனித்திருந்த

நேசமது சாதிலிங்க நேர்மையைக்- கோசமது

நாதவிந் துற்பவமே நானறிந்து ஞானவெட்டி

பேதமில்லை சாதிகுலம் பேசு. 

ஆறாதாரவகை இந்திரிய விவரம். 

( தரு )

விபரஞ்சொல்லுகிறேன்- தசநாடி- விபரஞ்சொல்லுகிறேன். 

பாடல் எண்:- 135

விவரஞ்சொல்லுது மிடைபிங்கலைசுழி

மேவுமத்திச் சிங்குபுருஷன் காந்தாரியும்

அம்பலம்புருடன்கு குதன்சங்குனியு

மாகத்தசநாடியை யிரண்டாண்டையே

இபரம்பெருவிரல் மேலுமிடைகலை

யின்பம்வலதுபெருவிரல்பிங்கலை

சுபரஞ்சுடரொளி மேலுமோங்காரமாய்ச்

சுற்றியேநிற்குஞ் சுழிமுனையாண்டையே- விபரஞ். 

பாடல் எண்:- 136

மூலச்சுழிதனிலே முனைத்தாக்கையு

மீறியேபெருநாடி யுயர்ந்துடன்

மேலைச்சிரமகமேரு முடிவளர் 

விற்புனமுங் கருவுற்பனஞ்சொல்வேனான்

கால்கொண்டு நாழிகலைகொண்டு வாய்வதுங்

காரணமாகவே கண்டமதாய்வளர்

வேல்கொண்டுமே குழல்கொண்டுடன் மூலமே

வித்தாய்முளைத்தொரு பத்திதுநாடிகாண்- விபரஞ். 

பாடல் எண்:- 137

கண்டமதுநரம்பான குழைதனில்

காந்தாரிநின்று கலந்துநீர்பாய்ந்திடில்

அண்டமதிலத்தி சிங்குவைத்தானு

மவற்றையு நாலுமறிவிப்பதாகுமே

நின்றிடுஞ் சிங்குவையப்பதுவின்மயம்

நின்றநிறமது வுப்பதுவேசலம்

விண்டலம்புருடனிரு கண்ணளவு

மேவுங்காந்தாரியிங்கா தளவாண்டையே- விபரஞ். 

பாடல் எண்:- 138

அத்தியுநின்றதது வலபாரிச

மானதளவா யமைத்தளவாய்பிர்ம

வித்தையுமாருயிரைம் புலனாதிகள்

வேதங்களோது மேலுந்தாள்வாயினி

சுத்திநிற்குஞ் சுகாதீதசங்குனி

சுந்தரலிங்கஞ் சுகந்ததாள்பாரிசம்

மித்தமேவுங்குகுதனு மானந்தம்

நேருந்தாள்வாயுமே நின்றிடுமாண்டையே- விபரஞ். 

பாடல் எண்:- 139

நாடியீரைஞ்சு நரம்புகள் கூடியே

நல்கிநடப்பது நட்புகள் கண்டிடில்

நீடியுலாவும் மசையுந்தடுக்கம்

நிரந்தர தாதுசதந்தரநாடியே

நாடியசையுமடக்கு முடக்கு

நடந்துமேயோடி நகர்ந்துபுரண்டு

மோடிகூடியிழுக்கு நரம்புநீண்

டேறிமாறிபடுக்கும் பாராண்டையே- விபரஞ். 

பாடல் எண்:- 140

வாய்வுதச பத்தின்வாறுமறிந்திடில்

வளமையாம்பிராணன் பானன்வியானனும்

சேயுமுதானன் சமானன் கூர்மகனாகன்

திரிகரனாகிய சித்திரநாடிதான்

ஆயுநாடிநரம்பதுவுந் தனஞ்செய

னருள் தருவேதந்தத்துவனீரைஞ்சு

பாயுந்தசவாய்வு பத்துடனானதும்

பார்க்கப்பார்க்கப் பரீட்சைகளாயிடும்- விபரஞ். 

பாடல் எண்:- 141

பிராணன்மூலந்தனில்மேல் தொடர்ந்தோங்கியே

பின்னும் பனிரெண்டுவங்குலமோடிடில்

அறிவதுநான்குபண்டடங்கி நாலோடும்

அபானன் மலசலமறிந்து போக்கிடும்

பிரியும்வியானனு முண்டசாரந்தனைப்

பிரித்தெழுந்தெழுபத்தீராயிர நாடிக்கும்

தரியுமுதானன் செரிப்பித்தேப்பமிடச் சமானன் 

சரியாகத்தானிருக்கும்வாறு- விபரஞ். 

பாடல் எண்:- 142

நாகன்களைவிக்கல் சோம்பலுண்டாக்கிடில்

நற்கண்ணிலேநின்று கூர்மனிமைத்திடில்

தேகத்திரிகரஞ் சோபமுண்டாக்கிடில்

தேவதத்தனுங்கொட்டாவி நகைத்திடில்

வாகச்சிரித்திடில் தனஞ்செயனுச்சி

வாழ்வதுமேலேனுந் தொடங்கியாத்துமம்

ஆகமடங்கியப் போதினிலண்டமது

பிளந்தாக்கினை யப்பாலோடிடுங்காண்- விபரஞ். 

பாடல் எண்:- 143

இந்தவிதமறிந் தெவ்வுயிர்க்குமீச

னெறும்புமே கடையானை முதற்கொண்டு

சிந்தைசெய்யாமல் வெவ்வேறதின் கூறதாம்

செந்துக்களுற்பன விந்தையிதாண்டையே

சுந்தரலிங்கஞ் சுதாதீதமந்திரஞ்

சுக்கிலவிந்து சிரசண்டமாயிடில்

அந்தரகங்கைச்சடை முடியீச

னமர்ந்திடுங்கோசமரன் கொலுவாண்டையே- விபரஞ். 

( விருத்தம் )

பாடல் எண்:- 144

இடைகலையும் பிங்கலையு மிரண்டுங் கூடி

யிருகாலில் பெருவிரல் மேலே நின்று

நடுவிலொரு கத்தரிக்கோல் மாற லாகி

நாசிமுனை முட்டிநிற்கு நயந்து பார்க்கத்

திடமுடைய சுழியின் முனை மூல நோக்கிச்

சிரசளவு மாதார மாகி நிற்கும்

அடைவான சிங்குவைத்தா னாவுக்குள்ளே 

யன்னமுடன் தண்ணீரு மமைந்த தாண்டே. 

பாடல் எண்:- 145

வட்டமிட்ட புவியதனில் குகுத னிற்கும்

வலதுதாள் காந்தாரி வாக்கில் நிற்கும்

இஷ்டவலம் புருடனிட தாள வாய

மிருந்திடுஞ்சங் குனியும் லிங்கத் தாள்வாய் நிற்கும்

சட்டமுடன் குகுதனிற்கும் பானன் தாள்வாய்ச்

சார்வாகுந் தசநாடி சமைந்த நேர்மை

அஷ்டதிசை புகழுமுட லுயிரு மாக

ஆதரவா யாவிநின்ற தருள்செய் வேனே. 

பாடல் எண்:- 146

பேரான பிராணன்பெரு மூலந் தன்னில்

பிலத்தவீரா றங்குலத்தில் பீள வாங்கி

நேரான கண்டமதி லெட்டெட் டாகி

நிலைபிசகா நாலுமது வெளியி லோடும்

சீரான வபானனுந்திக் கமலத் தின்கீழ்த்

திறமாக மலசலத்தைக் கழித்துநிற்கும்

ஈறான வியானனுண்ட வண்ணந் தண்ணீ

ரெழுபத்தீ ராயிரநா டியிலுஞ் சென்றே. 

பாடல் எண்:- 147

நின் றிலங்கு நாடியது பிரித்து வைக்கும்

நிகழ்த்திடுமு தானன்செரிப் பித்தே நிற்கும்

ஒன் றிலங்குஞ் சமானனுண்ட வன்னந் தண்ணீ

ரொருவருக்கு மேறவொட்டா திருக்கு மாகில்

தன் றிலங்கு நாகனுமே விக்கல் கக்கல்

தனை மிகுந்த கூர்மனிரு விழிநீர் பாய்ச்சல் 

அன் றிவிழி சிமிட்டிவைக்குந் திரிக ரன்றா

னாயாசம் சோம்பல்தும் பலசதி யாமே. 

பாடல் எண்:- 148

வசதி நகைத் திடுவனெனும் வழலை யாவன்

வகைத்திடுவன் தனஞ்செயனு முச்சி யேறி

நிசதி நின்று மேலாகத் துடிக்கச் செய்வன்

நிரந்தரமா யாதார மேலாய் நிற்பன்

நிசதியினால் சரீரத்தில் வாய்வுக் கெல்லாம்

நிஷ்களமா யதிகாய நிலைத்த தாண்டே

இசைத்ததிரு மூலனா ருரைத்த வண்ண

மினியதொரு ஞானவெட்டி யியம்பி னேனே. 

பாடல் எண்:- 149

நிரந்தரமாய் மூலமென்ற பாண்டந் தன்னை

நீடுலகி னடத்திவைத்து மோசஞ் செய்தல்

தரந்தரமாய்க் கருவியெல்லா மாண்ட பின்பு

தனஞ்செயனு மகண்டவெளி சார்ந்து வேகி

அறுந்துதச நாடியெல்லா மசைவெல் லாம்போ

யாதார மாறுமகன் றசைவு மற்றுச்

சிறந்தவுட லுயிர்கூறிச் செயலுஞ் சொன்னேன்

தெரிசனமுங் கண்டுதிரு வுருசொன் னேனே. 

பாடல் எண்:- 150

திருவுருதன் மலர்தரித்த பரனைப் போற்றிச்

செப்புகிறேன் குறைக்கருவி தெளிந்து தானும்

மருவுமதி மலர்க்கமல விதழின் மேவும்

மதுரசர் வாணியருள் மகிழ்ந்து வென்னை

அருவுருவாய்க் கருவிகர ணாதி யெல்லா

மடிபிசகா நடுதனையு முடியுஞ் சொன்னாள்

குருவருளா லம்பிகைப்பெண் கமலம் போற்றிக்

கூறுகிறே னுடலெடுத்த வரலா றாண்டே. 

( கொச்சகம் )

பாடல் எண்:- 151

வாரான கொங்கைமட மாது கருக்குழியில்

பாராமல் வந்துதித்துப் பரிதவித்து நின்றேன் காண்

ஊராங் கருவூரை யுற்றதுணை யென்று நம்பி

மாராட்டத் துள்ளேயான் வந்து சமைந்தேனே. 

பாடல் எண்:- 152

பாராம லேயெழுந்து பத்தியருள் சித்திபெற

நீர்மேற் குமிழியென்று நினைவி லறியாமல்

சீர்மே லெழுந்தசிவ நாதவிந்து தன்னருளால்

ஊர்மேல் வளர்ந்துமன துள்ளமதி கெட்டேனே. 

பாடல் எண்:- 153

காயா புரிநகரிற் கனககிரி மேவிவளர்

மாயாப் பிறவியெனு மகிழ்ந்திருப்ப தெக்காலம்

தாயாய் முலைகொடுத்துச் சார்ந்தென்னை யீன்றகுரு

தேயா மணிவிளக்கே செம்பொனரு ளம்பிகையே. 

பாடல் எண்:- 154

அம்பிகைப்பெண் செம்பொன்மணி யமிர்தரச பானமருள்

நம்பிதிரு வம்பரமே நாடிநட னம்புரிவாய்

உம்பரருள் நாதவிந்து வோர்கருவி யென்றறிவால்

கும்பமுனி யாலுரைத்த கொஞ்சும்ரத்ன மாமதியே. 

பாடல் எண்:- 155

ஆதியந்த நிர்க்குணமே யண்டபிண்ட மேவுதிருச்

சோதிநட னம்புரியுஞ் சுழிவிட்டு வாசலிலே

நீதிக் கருவூர் நிலையாய்க் குடியிருந்து

சாதிகுல மெல்லாந் தவிர்ந்துசதுர் மேல்வளர்ந்தே. 

( வெண்பா )

பாடல் எண்:- 156

தூராத கும்பிதனில் துலையாத பாண்டமதில்

வீராக வீற்றிருந்தேன் மேல்வீட்டில்- நேராக

சண்ட னணுகாமல் சதுஷ்கமல சந்நிதியில்

அன்றுதித்து வந்தேன்கா ணாண்டே. 

பாடல் எண்:- 157

பசுபாச யோனிதனில் பாராம லேயழுந்தி

விசுவாச பாதகராய் விரகழிந்து- நிசுவாச

நதியிற் கரையோர நவசித்திர மண்டபத்தில்

விதியே கதியெனவே விந்து. 

பாடல் எண்:- 158

விந்து வழியறிய மேதினியில் யானுதித்து

வந்தவழி கண்டறியா மையல்கொண்டு- தையலுடன்

விரக மதுசுகமே யின்பது வேகடலில்

அரவமது வாய்வினையென் றறி. 

( கலித்துறை )

பாடல் எண்:- 159

சுருதி முடிந்த திரிகோண வட்டச் சுழிமுனையில்

இருந்து வளர்ந்து கருவுரு வாகி யினிதசையான்

கருதி விளங்கு மதிமலர் வாசங் கனகிரிமேல்

சதுஷ்கோண வீட்டி லிருந்துமெய்ஞ் ஞானத் தலமறிந்தே. 

பாடல் எண்:- 160

மடலோலை கொண்டு வெழுதாத சோதி வடிவுதனைச்

சடமேவு சின்ற வகையுரைத்தேன் சர்வ காலமெல்லாம் 

உடல்மேவு கின்ற கருவூ ரதுதனி லுள்ளதெல்லாம்

திடமாக யானுஞ் சபைமேவி நின்று தெளிவிப்பனே. 

வசையமுறை

 ( தரு)

வசையஞ்சொல்லுகிறேன்- ஆண்டைகேளீர் வசையஞ்சொல்லுகிறேன். 

பாடல் எண்:- 161

வசையமினிஐந்தும் வசனிப்பதாகவும் வகுக்கமா

வசையம்பருவசையமும்ரெண்டு

சுசையமலவசையஞ்சல வசையமும்ரெண்டு

சுக்கிலவசையமுடனை ந்துங்காணாண்டையே

அசைதலைந்துகுணமு மறிய

வசையமதினாக்கைரட்சித் தருளுமாண்டே யுனதுபதம்

நிசைதலம்பிகைமாது நிலைத்தபடியுரைக்கும்

நெறியைத்திருவள்ளுவன் நிகழ்த்தஞானவெட்டியான்- வசை. 

பாடல் எண்:- 162

அன்னந்தண்ணீரிருக்கு மிடமும்

மாவசையமதனை யினிப்பிரிக்கு மிடமும்பருவசைய

முன்னுமலமுஞ் சேருமிடமுமலவசைய

மூறியேநீரதுசேருமிடமுஞ் சலவசையம்

சொன்னபதிக்கெட்டாத சிவமூலநாதவிந்து

சுக்கிலவசையமென்று சொல்வேனாகமப்படி

தன்னைத்தனையறிதல் தலமுமறிதலுமே

சங்கையாவதுஞான தத்துவக்கட்டளையாண்டே- வசை. 

பாடல் :- 163

கோசமயமுமைந்துங் குறியறிதலும்பேத

குணமாமன்னமயத்தால் பிராணமயமிரண்டு

வாசமுமன்னந்தனிலும் பிராணமயமுந்தோன்று

மன்னமயத்தில் பிராணமனோமயங்களுந் தோன்றும்

நிசமாமனோமயத்தில் விக்கியானமயமுந் தோன்றும்

நிருவிக்கியானமயத்தி லானந்தமயமுந் தோன்றும்

இசைவாமெண்சாணுடலிலெழு பத்தீராயிரமுமிருந்து

காத்துரட்சித்து இருவினைகளுஞ்சூழ- வசை. 

பாடல் எண்:- 164

மூலாதாரத்தில் சுவாதிஷ்டானமுமறிதல்

மூலமுமணிபூரக மனாகதம்விசுத்திகாணு

மேலாமாக்கினை யுமாதாரமு மாறுவிதமாய்விசித

மிதுவறியவிதியை வெல்லலாமோசொல்

மூலமெனுங்குய்யத்து நடுவேசுவாதிஷ்டான

முதலானதுவேலிலங்குஞ்சிவமே ஞானப்பிரகாசம்

ஞாலமுமணிபூரகம் நாபிக்கமலமது

நாடியவனாகதமு மிருதயமென்றிதுகாணும்- வசை. 

பாடல் எண்:- 165

நின்றதிதுவிசுத்திகண்டந்தனில் நினைக்கும்

நேராவாக்கினையின்மேல் மதியங்கண்டதியலாம்

மண்டலமூன்றுமறிதல் வன்னியெனு

மக்கினிமகிழுமண்டிலமிதுவகையறிவது நல்லோர்

அண்டர்கள் முனிவர்கள் போற்றுமாதித்த மண்டலமெய்தல்

அதிலுதித்திடுஞ்சந்திர வகண்டமண்டலஞ்சூழும்

கண்டமெப்படி யண்டமண்டலமறிந்தெந்தன்

கருத்தில்நினைத்தபடி கருவிதொண்ணூற்றாறும்- வசை. 

பாடல் எண்:- 166

அக்கினிமூலந்தொடங்கி நாபிக்கமலவிதழள

வாகியேயுதித்து ஆதித்தமண்டலமீறி

திக்கில்திக்கிலினிய நாபிக்கமலமெய்தல்

திசைகளெட்டதற்குந் தொட்டளவிற்றெளிந்திலகும்

தக்கபுகழுஞ்சந்திரமண்டல மிருதயத்தில்சார்ந்து

சார்வாய்த்தொடங்கி சடைமுடியடிநடு

விக்கிரமகதிர்மதி சூழக்கினிமண்டலமூன்றும்

விளங்குமதுரத்தமிழமிர்த சிந்துரத்தினம்- வசை.

பாடல் எண்:- 167

மும்மலமூன்றுமுதிக்குமுன்னமே முறைமையறி

முனையுமாணவமாய்கை மோகமதாகிய காமியம்

நிர்மலசொரூபநிலைநினைவு முக்குணஞ்சொன்னேன்

நெறியைச்சொல்லவுஞான நேசமேயறியலார்காண்

அம்மெனுநானென்றுநாவை ஆணவங்காத்திடிலுமே

யபசயமேதனக்கு யாவரறியாக்கோபம்

தம்முயிர்போந்தனைக்கொன்று தனையறியாமல் நிற்குந்

தன்புத்தித்தானறிந்தாலுந்தா னொருவரைக்கேட்கும்- வசை. 

பாடல் எண்:- 168

நம்பிமனதுவேறாய்க் காமியந்தனைக்கொன்று

நானுடலங்கண்டதுக்கெல்லா நானென்றுமாசைப்படுதல்

வம்புமிகவுஞ் செய்தல்மாதர் மங்கையர்மேலு

மையல்கொண்டுவிரகத்தால் வாதுபோராடல்பேசல்

தும்பமுன்றுதித்திடும் வகையையாவர்கள் காண

துடியாய் வாதமும்பித்தஞ்சுகந்த சேத்துமமூன்றும்

தம்பனமுள்ளவாய்வது மோடிக்கலக்கமதாய்த்

தாபமுஞ்செய்தேயக்கினி சார்ந்துமத்திபஞ்செய்தல்- வசை. 

பாடல் எண்:- 169

வாசமுள்ளபிராணத்தின் வாய்வுநெட்டிட்டுமோடி

வளருமக்கினியதைமடக்கி மத்திபஞ்செய்தல்

நேசமுடனேபித்தம் வன்னியோடனுமித்து

நிறைந்துமத்தித்துசலம் நெடியவினையுண்டாக்கும்

சேதமிகவுண்டாகுஞ் சேத்துமரோமத்துவாரம்

சிறந்துவோடியிடைபின் பிரியாச்சிநேகஞ்செய்தால்

மாதராசையிலிந்தநாடி பின்னிட்டடங்கி

மறிந்தறியாமல்தாது மடங்குமென்றாகையாலும்- வசை. 

பாடல் எண்:- 170

இச்சைமூன்றானவித மினியுரைக்கும்வகைகா

ணிதுவேபுத்திரவிச்சை லோகவிச்சையுமாகும்

பட்சமாமர்த்தவிச்சையுமிதன் கூறறியவெந்தன்

பரிபூரணவம்பிகை பாதமலர்பணிந்தேன்

அஷ்டதிக்கும்புகழு மகத்தீசருள்போற்றியபடி

யன்றிருவள் ளுவனவனிமீதிலிந்நூல்

நிஷ்டையோகத்தின் ஞான நிகழ்ந்தமூன்றுவகை

நிகழுமிச்சையதின் சுகத்தைக் கண்டவனாண்டே- வசை. 

பாடல் எண்:- 171

புத்திரன் இச்சையின் குணம் பொருள்மேலாசைப்படுதல்

புவியில்மண்ணின் பெண்ணாசை புவனமாளவுஞ்செய்தல்

அர்த்தத்தின்மேலுமதிக வாசைப்படுதல் நெஞ்ச

மறிதலோகவிச்சையின் விதியின்பயனுரைத்தல்

வெற்றிப்பாரிலுயர்ந்த காணியாட்சிவிளம்பல்

வெகுநாளுறவின்முறை தகுந்தகாதுவிளம்பல்

உற்றகாரியமுணர்ந் திச்சையத்தின்மேலாத

லுசிதப்பணிகள் செய்து விசிதம்பார்த்திடுமாதல்- வசை. 

பாடல் எண்:- 172

அர்த்தவிச்சையின்குண மதிககாமியந்தேடியன்

பதிகமுமாசை யின்பமதிலுண்டாதல்

எத்திசையினெந்த சாதியிலுமங்கையரின்னா

ரிவர்களெனு மெண்ணாமலுமிச்சித்தல்

சத்திவிரகதாபசங்கையிலு மனதாய்சார்ந்துவிகார

மெய்தல்தனைப்புகழ்ந்துணர்வாதல்

வித்தையென்னுமிச்சை வரலாறுமூன்றின்

விபரமெடுத்துரைத்தேனாண்டையே தொடுத்தேனாதவிந்தாலே- வசை. 

பாடல் எண்:- 173

குணவிசிதலட்சண மதிலுதித்தபடி

குறித்துமூன்றுவிதமாய் விரித்துச்சொல்வேன்காணும்

மனதாகியகுணராசத தாமசம்ரெண்டுமகிழுஞ்

சாத்திகத்தோடுபுகழுமூன் றுவிதமாம்

துணமாம்ராசதகுணம் வெகுளிபலபேசாமல்

துதித்திடுவோந்தமக்குக் கொடுத்திடுதலுமேன்மை

பணம்விசிதவேண்டிய பாக்கியங்களளித்தல்

பண்புபாராட்டலாதல் பலவுபகாரஞ்செய்தல்- வசை. 

பாடல் எண்:- 174

தனைச்சார்ந்தோர்கள் தமக்குத்தகைமை காத்திடும்பேசல்

தனதுதம்முயிர்போலுஞ் சார்ந்துரட்சித்திடுதல்

இனம்வேண்டிடுதல் பகையிகத்தல்பலகலைக

ளிசைந்துலகிலகங் கொண்டிருந்து வாழ்தலுமுண்மை

கனமுமினமுநலம்புகழும் வாஞ்சையொடுக்குங்

கருதுந்தாடாண்மையின் பங்கருவிலமைத்தபடி

முனையும்ராசதகுணந்தனையே யறிவிப்பதுமெனையே

புகழ்வதில்லைதுணையே நாதவிந்தருள்- வசை. 

பாடல் எண்:- 175

மிருளுந்தாமசகுணவிசித மேன்மேல்விளம்பல்

மிகுதியாதொருபழிவிகடம் வஞ்சனைசெய்தல்

அலறும்வழிபாடாக வொழித்தல்வணக்கமாற

லரண்டுவரும்வெகுளியதனை விரும்பவெனல்

பிரளல்செய்தநன்றியைப் பிரித்தலுறுதிமாறல்

பெரிதாய்விந்தைமிகவும்பேசல் கடூர்வாஞ்சை

முரளுமுகத்திடறுபகையுடனேயும் வாழ்த்தல்

முன்புரைத்தபழியேமுனைதல் கூறலுமாண்டே- வசை. 

பாடல் எண்:- 176

கொலைகள்காமியமும் பொய்குறித்தல் கோள்கள்பொல்லாங்கு

குசிதம்யாவையும்புகழ் குரோதங்கொடூர மெய்தல்

அலைதல்காமத்தினிவை குரோதமதிசங்கை

யசத்தியநாள்தோறுமெய்தலறித லாண்டையேகேளீர்

பலபலவும்கடிசிலதுதொழில் விகற்பம்பகர்தல்

பாவியெனவுஞ் ஜெகதலமுமதியா

கலகப்பிரியனெனுமுலகமாத்தியஞ் சொல்லுங்

கருவில்தாமசகுண காட்சியிதாண்டையே- வசை. 

பாடல் எண்:- 177

அதிதசத்துவ குணமறிதலனேகவித

மனைத்தும்படைத்தகர்த்தன் மனதுளிருப்பதெனில்

விசித்தமதங்கடிவு வாய்மைதயவொடுக்க

மிகுத்தசாந்தகமைதன நினைவுதகைந்திடுதல்

உதித்தவன்புபெருமைபுகழ்தல் குணவிசித

முரிமைமறையினிறை தருமமானமியக்கல்

கதித்தநல்லோர்க்கீதல் அறிஞர்களைவாழ்வித்தல்

கருதுமிறைவனடிபணிதல் நலமறிதல்- வசை. 

பாடல் எண்:- 178

மகத்துக்களின்மனது மகிழ்ச்சிவருவதெனில்

மலர்க்கமலபதத்தில்வணக்கஞ் செய்திடுதலால்

அகற்றும்பழியகற்றல்விளையும் பிணியொழித்த

லதிதநல்லோர் பெரியோரவர்களுக்குப் பொருளுமீதல்

இகத்திலறமுந்தேடலுறவின் முறையதீத

மினமுஞ்சுற்றத்தாரையுங்கனமுங் காத்துரக்ஷித்தல்

மிகுத்தல்பசியகற்றலதிதிபரதேசிகள்

விரும்புமன்னபலாதிவிளங்குமேவுமீ தாண்டே- வசை. 

பாடல் எண்:- 179

ஆத்திரைவாசங்கள் செய்தலருமறையோரைக்காண

லருள்தேவதைகளுக்குமாகு பலிகொடுத்தல்

தேத்தியஞானப்பிரகாசந் தெளிந்தவர்கள்தமக்கு

சிந்தையையகற்றி யுபசாரஞ்செய்திடுதலால்

போற்றிடும்புண்ணியஞ்செய்தலின் பசுகந்தமலர்

பூசுரர் தமக்குநலம்புகழும் பூசையளித்தல்

வீற்றிடுஞ்சாத்தியகுணவிசித லட்சணங்கண்டு

விளங்குமூன்றின்விபரம் விதித்தவாறதுஆண்டே- வசை. 

பாடல் எண்:- 180

நாதவிந்ததினாலே நரகசொர்க்கமிரண்டும்

நவிலுநல்வினையுந்தீவினையு நாடியவாறில்

வேதங்களுமுதித்தசாரம் விண்ணுமண்ணாகில்

விளங்குநல்வினையும்வந்துதித்தல் புண்ணியஞ்செய்தல்

ஓதுந்தீவினையுஞ்செய்திடும் பாவங்களுமெய்த

லுலகமாதிதமிவ்வாறுடலெடுத் துவமையால்

மாதுவம்பிகையெந்தன் மனதுக்குளுணர்வித்த

வரலாறறிந்திந்நூல்வசனித்தே னாண்டையே- வசை. 

பாடல் எண்:- 181

ராகமிதுவெட்டான நடத்தையிவ்வாறறிதல்

நலத்தகாமக் குரோதலோபமோகமதாகி

அகந்தனிலுதித்த மதமாச்சரியத்தோடு

மமைத்திடலுமிடும்பையறிதல் வேட்கையிதுகாண்

பாகமதாகியதே கஞ்சரீரங்களுதிக்கும்

பலனேயின்னதினிதும்பகர்ந்து சொலுவேன்காணும்

தேசக்கட்டளையிவ்வாறுசெய்கை செந்துகட்கெல்லாந்தெளிந்து 

சீர்பிசகாமல்திருத்த ஆண்டையேகேளீர்- வசை. 

பாடல் எண்:- 182

மாதரைக்கண்டாசைகொண்டிடுங்காண் விரகதாப

மையல்கொண்டதிதகாமம்வருதல் மன்மதபாணம்

பேதபேதமில்லாமல்பிதற்றும் வணக்கமில்லா

பிணக்குமதிதகுரோதந் தனக்குந்தனைத் தெரியா

ஓதுமனதிலொன்றைநினைத்தபடி முடித்த

லொருபிடியாய்ப்பிடித்தலுறுதி விடாதுலோபம்

ஏதுவாகிலும்பெருமையின் பசுகாதிசுக

மெய்துமனமகிழ்ச்சியிதுவே மோகாதியோகம்- வசை. 

பாடல் எண்:- 183

சூதுமனதிலெண்ணல்துடியாக் கோபமுரைத்தல்

தொடுத்திடுதலும்பழிதுன்பமெய்திடுமதம்

யாதொருகாரியங்களிலதுவிச்சை மனதெய்தலானந்தம்

பெருகியின்பமடையு மாச்சரியங்காண்

வாதுபோராடலொருசொல்லாயிரம் விரிவாய்வனல்

கொண்டாங்காரமெய்தல் வருமிடும்பையுமாதல்

வேதுவித்வேஷணம்பலவும் பலவுமெண்ணல்மெய்

யாங்காரக்கொள்ளல்வேறு செய்தலும்வேட்கை- வசை. 

பாடல் எண்:- 184

ஆகமத்திலுதித்தராகமத்தின் பரீட்சை

யதிதகுணலட்சணம்விதி தவறாமலெட்டும்

பாகமதாயுரைத்தேன் பகவான்சொற்படிபாரில்

பலகலையுந்தெளிந்து பழம்பொருளைக்கண்டு

ஏகவஸ்துவொன்றாலேயெடுத்தேன் தத்துவநெறி

யெறும்புகடையாயானை யெண்பத்துநான்குமுதல்

தோகைமாதுவம்பிகைசொல்லுஞ்சூட்ச மறிந்தேன்

சுருதிமுடிவைக்கண்டுதொடுத்தேன் ஞானவெட்டியான்- வசை. 

பாடல் எண்:- 185

அவத்தையைந்துமொவ்வொன்றாய் விரித்துசொல்லுவன்காணு

மாக்கிரசாக்கிரசொப்பனஞ் சுழுத்தியொடுதுரியம்

பவத்தைப்பவனாதீதத்துரியாதீதத் தோடைந்தும்படைத்தா

ரெண்சாணுடலிலெடுத்தார் ஜெகத்துள்ளோர்க்கும்

இவத்தையெனுஞ் செனனமிதிலுதித்ததுகாணு

மெவரெவருக்குமிதுவே யேகவஸ்துவிதாகும்

தவத்தில்மிகுத்தவமெய்ஞ்ஞான நெடுதத்துவமறிந்து

தன்னைத்தான்றிந்திடுமே சொர்க்கம்- வசை. 

பாடல் எண்:- 186

ஆக்கிரமுஞ்சாக்கிரம்நிற்கு மதுவும்லலாட ஸ்தானத்திலறிதல்

நெற்றிநேர்மையமசைதல் காயத்தோடென்னில்

வாக்கிற்சொப்பனத்திற்கும் வாழ்தல்கண்டஸ்தானத்தில்

மருவியகருவிகளமைத்த வாறாண்டையே

விக்கிரமச்சுழியின் முனையிருதயகமலந்தனில்

விளங்குந்தானமறிதல் இன்பமிதுவாறுகாணும்

நிக்கிரகதுரியஸ்தான நேருமேநாபிக்கமலம்

நிரந்தரமாயிருத்தல் நிலைக்கும்சரீரமென்னில்

பாடல் எண்:- 187

உத்தமதுரியாதீத மூலாதாஸ்தானத்தி

லுறுதிபெற்றிலகு மிவ்விதத்திலுதித்தவாறு

தத்துவந்தொண்ணூற்றாறுஞ் சரீரந்தனிலுதிக்குந்

தகைமையறிந்துவந்தென் தாய்சொல்லயானறிந்து

வித்திலுதித்தவாறும் விளங்குங்கருவின்வாறு

மிகுத்த தத்துவந்தொண்ணூற்றாறை விதிக்கும்வாறும்

கர்த்தனருளாலுடல் கருதரித்தநேர்மையுங்

கருவிகரணாதிகள்கண்டு ஆய்ந்தவனாண்டே- வசை. 

பாடல் எண்:- 188

சித்தாதிகள்மகிழும்பெரியோர்களும் புகழுஞ்

ஜெயம்பெறவேயுலகில் செந்துக்களெல்லாந்தழைக்க

உத்தமயோகிகளெந்தனுறுதி மிகவுங்கண்டு

யோகவான் திருவள்ளுவனுலகி லவனேஞானி

வித்துவானெனமகிழ்ந்து வேதவேதாந்தசாரம்

விளங்கினவர்கள மிர்தவிசித ரத்னபீடம்

உத்தமரெனுமுனிவர் சிவசிங்காதனமீந்து

வுரையறிந்துமொழிந்த வுவமையீதெனுமாண்டே- வசை. 

பாடல் எண்:- 189

கர்த்தன்செய்கைவிதிகாண் கருவிலமைத்தபடி

காரணசற்குருவாக்கியங் கண்டல்லோதெளியும்

பெற்றபேர்களிப்படிவித்தின் சம்பிரதாயங்கள்

பேசும்பேசினாலென்ன பிராணாயமறியலாமோ

தத்துவந்தொண்ணூற்றாறுந் தானேநீறுநீறாக்கி

சாதித்தால்காயாதிகற்பஞ் சாயுச்சியமறியலாகும்

நித்தம்நித்தம்வாசிகொண்டுய்த்து வூதினாலல்லோ

செத்தபிணமெழுந்து சத்துஞ்சித்தறியலாம்- வசை. 

( விருத்தம் )

பாடல் எண்:- 190

விரிவான துருவமெனு மூல வீட்டில்

வேதமதுக் கெட்டாத ரூப மாகிக்

கருவாகித் தெவிட்டாத கனியு மாகிக்

கதிராகி மதியாகிக் காற்று மாகி

உருவாகி யுடலாகி யுயிரு மாகி

யொளியாகி யலகையெனு முடலுக் குள்ளே

மருவாகி யருள்ஞான சொரூபி யாகி

யங்கமதி லிங்கமதா யமைத்தே னாண்டே. 

பாடல் எண்:- 191

மறைகடந்து வெளிதாண்டிச் சுழிமுனைக் குள்ளே

மறைநான்கு மறியாத மதியைக் காணக்

கரைகடந்து சுழிக்குநடு வணையி னுள்ளே

கதிரிலகுந் திருநாட்டுக் கமல வீட்டில்

நிறையறிந்த கதலியடி பானுக் குள்ளே

நிலையான செங்கநதி கரையின் மேலும்

திரைமேவுந் திருநடன வீட்டுக் குள்ளே

சிவந்தெழுந்து கொழுந்தாகி வளர்ந்த தாண்டே. 

பாடல் எண்:- 192

முத்துதிர்ந்து குலைசாயு மூல நாடு

முனையறிந்து கலைபாயு முவண நாடு

சித்திருந்து விளையாடுந் தெய்வ நாடு

திவ்யரத்ன பொக்கிஷமாஞ் செல்வ நாடு

சத்திசிவ மிருந்துதிரு நடனஞ் செய்யுஞ்

சதாசிவனுங் கொலுவிருந்து வாழ்ந்த நாடு

அத்திபுர மிலகுகின்ற கருவூர் நாட்டி

லறைவீட்டில் குடியிருந்து வமைந்தே னாண்டே. 

பாடல் எண்:- 193

சாதிகுலம் வகுத்திலகும் விந்து நாடு

தானுதித்துப் பத்துதிங்கள் வளர்ந்த நாடு

நீதிமறை சாஸ்திரமாம் வேத நாடு

நெறிபலவுஞ் சகலகலை யுதித்த நாடு

சோதிமதி யாகிநின்று துலங்கு நாடு

சுழிநாடு வளநாடு தொண்டைநாடு

பாதிமதி தனையணிந்த பரம நாட்டில்

பதியெனவே குடியாக வாழ்ந்தே னாண்டே. 

பாடல் எண்:- 194

தேனருவி யமிர்தநதிக் கசிந்து பாயுந்

தேவர்சித்தர் முனிவர்துதித் திலகு நாடு

ஞானிகள்வந் துதித்திலகுங் கருவூர் நாடு

நல்வினையுந் தீவினையு மமைந்த நாடு

தானவனாய் நின் றிலங்கும் ரூப நாடு

சற்குருவுஞ் சந்நிதியுந் தழைத்த நாடு

வானதிகொண் டறுசுவையை யொளித்த நாடு

வானவர்கள் மகிழுமணி மந்திர நாடே. 

பாடல் எண்:- 195

அண்டபிண்டமிரண்டுமுற் றிலகு நாடு

அருணனெனுஞ் சோமனவ தரித்த நாடு

மண்டலமூன் றுதிக்குமருள் கொந்தி நாடு

மாமறையு மாகமங்கள் வாழு நாடு

கண்டனந்த கருவூரு நாட்டுக்குள்ளே

கனகரத்ன மாதுவொளி வாகி நின்ற

வென்றதிரு வம்பிகைப்பெண் விளங்கும் வீட்டில்

மிகுந்தவறைக் குள்ளிருந்து வமைந்தே னாண்டே. 

பாடல் எண்:- 196

அந்தமுள்ள நவசித்திரக் கூடந் தன்னி

லகண்டமெனுந் தீபவொளி வாகு நாடு

சந்தனமுங் குங்குமமும் விளைந்த நாடு

சர்வவுயி ரெடுத்துடலா யமைத்த நாடு

செந்தியொளி சிவனுமையும் பிரகா சிக்குஞ்

சிறுபிறையு மயிர்ப்பாலந் தேவ நாடு

வெந்தணலு மெழுந்துதிரு நடன மேவு

மேல்வீட்டி னின் றுவுரு வானே னாண்டே. 

பாடல் எண்:- 197

உருகருவாய் நின்றிலங்கு முந்தி நாடு

வுத்தமர்கள் சித்தர்தவம் பெற்ற நாடு

மருநாடு வானாடு மலரி னாடு

மதமுடனே மாச்சரிய மான நாடு

சிறுநாடு கருநாடு செந்தி நாடு

செங்கதிர் பொங்குமுயல் சிறந்த நாடு

அருநாடு குருநாடு வகண்ட நாட்டி

லருள்பெறவே யுருவாகி யறிந்தே னாண்டே. 

பாடல் எண்:- 198

கால்வாங்கி வட்டமிட்டு மேலே நின்று

கமலதிரு வாசலின்கீழ்க் கருதி யானும்

மேல்வாங்கி யுயருகின்ற வன்னி யோடே

வெளிகடந்து நாற்சதுர வீட்டுக்குள்ளே

சேல்வாங்கி நூலிழைத்துப் பாவு மோட்டிச்

சித்திரமாய்க் குழிதனிலே நெசவு மாக்கித்

தேல்வாங்கு விழிமட வார்க ளுள்ளே

சித்திரமாயுடலெடுத்து வளர்ந்தே னாண்டே. 

பாடல் எண்:- 199

வசையமைந்து நின்றவர லாறுஞ் சொன்னேன்

வசனித்தே னவரவர்கள் வகையுஞ் சொன்னேன்

விசயமெனு மூன்றுக்குள் விரியுஞ் சொன்னேன்

விபரமதா யவர்கள் செய்கை விளக்கஞ் சொன்னேன்

அசைவில்லா மண்டல மூன்றருளுஞ் சொன்னேன்

அறிவுடைய கோசமைந்து மதீதஞ் சொன்னேன்

சதவாய்வுந் தாதுநின்ற தலமுஞ் சொன்னேன்

சரீரத்தி னின்றதெல்லாஞ் சாற்றி னேனே. 

பாடல் எண்:- 200

அஷ்டகுண ராகமெட்டுங் கூறுஞ் சொன்னே

னவர்கள்செய்கை விபரமறிந் தனந்தஞ் சொன்னேன்

நஷ்டமில்லா நல்வினைதீ வினையுஞ் சொன்னேன்

நற்குணமுந் துர்க்குணமு நயந்து சொன்னேன்

கஷ்டமெனு மும்மலத்தின் கருத்துஞ் சொன்னேன்

கருவறியா மூடர்குணக் காட்சி சொன்னேன்

தீட்சையெனு மூன்றெழுத்தின் திறமுஞ் சொன்னேன்

திருமுதலாம் வீட்டில்குடி யிருந்தே னாண்டே.